انڈر 19 ایشیا کپ کے فائنل میں پاکستان نے بھارت کو 191 رنز کے بھاری مارجن سے شکست دے کر پہلی بار ایشیائی اعزاز اپنے نام کر لیا۔
دبئی میں کھیلے گئے ٹورنامنٹ کے فائنل میں پاکستان نے پہلے کھیلتے ہوئے مقررہ اوورز میں 8 وکٹوں کے نقصان پر 347 رنز بنائے۔ اوپنر سمیر منہاس نے شاندار بلے بازی کا مظاہرہ کرتے ہوئے 113 گیندوں پر 17 چوکوں اور 9 چھکوں کی مدد سے 172 رنز کی یادگار اننگ کھیلی۔ احمد حسین نے 56، عثمان خان نے 35، کپتان فرحان یوسف نے 19 جبکہ حمزہ ظہور نے 18 رنز کا اضافہ کیا۔
جواب میں بھارت کی ٹیم ہدف کے تعاقب میں مشکلات کا شکار رہی اور پوری ٹیم 156 رنز پر آؤٹ ہوگئی۔ 23 اوورز میں بھارت کا سکور 120 پر 8 وکٹیں ہو چکا تھا اور اسے جیت کے لیے مزید 228 رنز درکار تھے۔
پاکستان کی جانب سے حذیفہ احسن نے مؤثر بولنگ کرتے ہوئے کھلان پٹیل اور ہنیل پٹیل کی اہم وکٹیں حاصل کیں۔ عبدل سبحان نے بھی سخت لائن اور لینتھ برقرار رکھتے ہوئے بھارتی بیٹرز پر دباؤ برقرار رکھا۔ فیلڈنگ کے دوران لانگ آف پر دونوں کیچز نے پاکستان کی گرفت مضبوط کی۔
میچ سے قبل ٹاس کے موقع پر اور ٹرافی کے ساتھ تصویر کھنچوانے کے لمحے میں بھی کپتانوں کے درمیان ہینڈ شیک نہیں ہوا، جس نے شائقین کی توجہ اپنی طرف مبذول کرلی۔
واضح رہے کہ 2012 میں پاکستان اور بھارت مشترکہ طور پر چیمپیئن قرار پائے تھے، تاہم پاکستان پہلی مرتبہ انڈر 19 ایشیا کپ کا فاتح بن کر اُبھرا ہے۔ پاکستان اس سے قبل دو مرتبہ آئی سی سی انڈر 19 ورلڈ کپ اپنے نام کر چکا ہے۔
