وزیراعظم پاکستان شہباز شریف نے بھارت کے خلاف فائنل میں شاندار کامیابی حاصل کرنے پر قومی انڈر 19 کرکٹ ٹیم کے ہر کھلاڑی کے لیے ایک ایک کروڑ روپے انعام کا اعلان کیا ہے۔
اس موقع پر ایشین انڈر 19 چیمپئن ٹیم کے اعزاز میں وزیراعظم ہاؤس میں استقبالیہ دیا گیا جہاں وزیراعظم نے تمام کھلاڑیوں کا خود استقبال کیا۔ تقریب میں چیئرمین پاکستان کرکٹ بورڈ محسن نقوی، وفاقی وزرا اور کابینہ کے دیگر ارکان بھی موجود تھے۔
وزیراعظم شہباز شریف نے فرداً فرداً کھلاڑیوں سے مصافحہ کیا اور بھارت کے خلاف شاندار کارکردگی پر ان کی بھرپور حوصلہ افزائی کی۔
انہوں نے کہا کہ آپ سب نے دنیا بھر میں پاکستان کا نام روشن کیا ہے اور بھارت کو بدترین شکست دینے پر پوری قوم آپ کو مبارکباد دیتی ہے۔ وزیراعظم کا کہنا تھا کہ انہوں نے خود دیکھا کہ ٹیم کس جوش و جذبے اور عزم کے ساتھ میدان میں اتری، ایسی کارکردگی پر انہیں اور تمام پاکستانیوں کو فخر ہے۔
وزیراعظم نے کھلاڑیوں پر زور دیا کہ وہ اپنی کارکردگی کا تسلسل برقرار رکھیں اور امید ظاہر کی کہ یہی نوجوان مستقبل میں انڈر 19 ورلڈ کپ بھی پاکستان کے نام کریں گے۔
انہوں نے چیئرمین پی سی بی کو ہدایت کی کہ تمام کھلاڑیوں کا خصوصی خیال رکھا جائے اور انہیں ہر ممکن سہولت فراہم کی جائے۔ شہباز شریف نے کہا کہ ان میں سے کئی کھلاڑی جلد پاکستان کی قومی ٹیم کا حصہ بنیں گے۔
اس موقع پر وزیراعظم نے سمیر منہاس کو بہترین کارکردگی پر شاباش دیتے ہوئے ہیرو قرار دیا اور پی سی بی کے امور احسن انداز میں چلانے پر محسن نقوی کو بھی مبارکباد پیش کی۔
استقبالیے کے بعد کھلاڑیوں کے اعزاز میں پرتکلف ظہرانہ دیا گیا، وزیراعظم نے کھلاڑیوں کے ہمراہ کھانا کھایا اور ان سے غیر رسمی گفتگو بھی کی۔ قومی انڈر 19 ٹیم کے کھلاڑیوں نے بھرپور عزت افزائی پر وزیراعظم اور عوام کا شکریہ ادا کیا اور مستقبل میں بھی بہترین کارکردگی کے تسلسل کو برقرار رکھنے کے عزم کا اظہار کیا۔
اس موقع پر قومی کرکٹ ٹیم کے سابق کپتان اور پاکستان انڈر 19 ٹیم کے مینٹور سرفراز احمد نے کہا کہ وزیراعظم کی جانب سے ایک ایک کروڑ روپے کے انعام کا اعلان نوجوان کھلاڑیوں کے لیے بڑا حوصلہ ہے اور یہ باصلاحیت پلیئرز مستقبل میں ملک کا نام مزید روشن کریں گے۔
