ایران کی پاسدارانِ انقلاب نے خلیج کے علاقے میں سمگل شدہ ایندھن لے جانے والے ایک جہاز کو تحویل میں لے لیا ہے، جس میں چار ملین لیٹر ایندھن موجود تھا۔
ایرانی سرکاری میڈیا کے مطابق یہ کارروائی بدھ کے روز عمل میں لائی گئی۔ نیم سرکاری خبر رساں ادارے تسنیم نے بتایا ہے کہ پاسدارانِ انقلاب کی فورسز نے جہاز کو اس وقت روکا جب وہ ایرانی علاقائی پانیوں سے باہر جانے کی کوشش کر رہا تھا۔
رپورٹ کے مطابق جہاز پر سوار تمام 16 افراد غیر ملکی شہری ہیں اور واقعے کو مزید تفتیش کے لیے عدلیہ کے حوالے کر دیا گیا ہے۔
العربیہ کے مطابق ایرانی فوج اور سیکیورٹی ادارے اس سے قبل بھی خلیج کے خطے میں ایسے جہازوں کو پکڑنے کے دعوے کرتے رہے ہیں جو مبینہ طور پر غیر قانونی طور پر ایندھن منتقل کر رہے ہوتے ہیں۔
ماہرین کے مطابق ایران میں پیٹرولیم مصنوعات کی قیمتیں دنیا میں کم ترین سطح پر ہونے کے باعث ایندھن کی اسمگلنگ ایک منافع بخش کاروبار بن چکی ہے، جس کے سبب پڑوسی ممالک کی جانب غیر قانونی ترسیل کے واقعات سامنے آتے رہتے ہیں۔
