کراچی (ڈیلی پاکستان آن لائن) – معروف پاکستانی اداکارہ اور ہدایتکارہ انجلین ملک نے کینسر پر قابو پانے میں کامیابی حاصل کر کے اپنے مداحوں کے لیے خوشخبری سنائی ہے۔ کینسر کی تشخیص کے بعد سے ہی انجلین ملک نے اپنے مداحوں کو اپنی صحت سے متعلق آگاہی دیتے ہوئے اس مشکل وقت میں امید اور حوصلہ کی مثال قائم کی۔ حال ہی میں اداکارہ نے سوشل میڈیا پر انسٹاگرام ویڈیو کے ذریعے اپنی صحت یابی کی خبر شیئر کی، جس میں انہوں نے بتایا کہ کینسر سے پاک سکین ایک بڑی فتح ہے، تاہم یہ سفر ابھی مکمل نہیں ہوا اور انہیں اپنی صحت کی نگرانی جاری رکھنی ہے۔
انجلین ملک نے وضاحت کی کہ طبی طور پر کینسر سے مکمل طور پر پاک قرار پانے کے لیے صاف سکین کے نتائج کو 2 سے 5 سال تک مسلسل مانیٹر کیا جاتا ہے، اور بعض اوقات یہ مدت 10 سال تک بھی ہو سکتی ہے۔ انہوں نے اپنے مداحوں سے مخاطب ہو کر کہا کہ اس مرحلے پر وہ کینسر سے پاک قرار دی گئی ہیں اور اب اپنی زندگی اور صحت کے نئے سفر کی جانب بڑھ رہی ہیں۔ انجلین ملک کی یہ کامیابی نہ صرف ان کے لیے بلکہ ان کے مداحوں کے لیے بھی حوصلہ افزا پیغام ہے کہ بیماری پر قابو پایا جا سکتا ہے اور محنت، صبر اور مثبت سوچ کے ذریعے مشکلات پر قابو پایا جا سکتا ہے
