لاہور کی انسدادِ دہشت گردی عدالت نے 9 مئی کو گلبرگ کے علاقے میں جلاؤ گھیراؤ اور گاڑیاں نذرِ آتش کرنے سے متعلق دو مقدمات کا تفصیلی تحریری فیصلہ جاری کر دیا ہے۔
عدالت نے شواہد کی عدم موجودگی پر 23 ملزمان کو بری کرنے کا حکم دیا، جبکہ پی ٹی آئی کے رہنماؤں سمیت 7 ملزمان کے خلاف جرم ثابت ہونے پر قید کی سزائیں سنائی گئیں۔
فیصلے کے مطابق پی ٹی آئی کے سینئر رہنما میاں محمود الرشید کو مختلف دفعات کے تحت مجموعی طور پر 33 سال قید اور 6 لاکھ روپے جرمانے کی سزا دی گئی۔
تحریری فیصلے میں بتایا گیا ہے کہ ڈاکٹر یاسمین راشد، عمر سرفراز چیمہ اور اعجاز چوہدری کو 10، 10 سال قید کی سزا سنائی گئی۔
عدالت نے قرار دیا کہ مذکورہ رہنما سازش کی میٹنگ میں موجود تھے اور پراسیکیوشن کے مطابق انہوں نے جلاؤ گھیراؤ کے واقعات کے لیے عوام میں اشتعال اور انتشار پھیلایا۔ فیصلے میں کہا گیا کہ پراسیکیوشن نے عدالت میں مختلف واٹس ایپ پیغامات، 70 سوشل میڈیا اکاؤنٹس کی تفصیلات اور فارنزک رپورٹس پیش کیں۔
عدالت کے مطابق جے آئی ٹی کی تفتیشی ٹیم نے ملزمان کو قصوروار قرار دیا اور ملزمان کی جانب سے جے آئی ٹی رپورٹ کو کسی بھی فورم پر چیلنج نہیں کیا گیا۔
اگرچہ ملزمان نے اپنے حتمی بیانات میں خود کو بے گناہ قرار دیا، تاہم عدالت نے دستیاب شواہد کی بنیاد پر سزاؤں کا فیصلہ سنایا۔
