اسلام آباد: وزارت خارجہ نے برطانیہ کے ڈپٹی ہیڈ آف مشن میٹ کینل کو طلب کرکے برطانیہ میں پیش آنے والے ایک سنگین واقعے پر سخت احتجاج ریکارڈ کیا ہے۔ یہ ڈیمارش بریڈفورڈ میں پاکستانی قونصلیٹ کے باہر ہونے والے احتجاج کے بعد جاری کیا گیا، جس میں مظاہرین نے چیف آف ڈیفنس فورسز کے خلاف انتہائی اشتعال انگیز اور قابل اعتراض زبان استعمال کی اور فیلڈ مارشل کو جان سے مارنے کی دھمکیاں دیں، حتیٰ کہ کہا گیا کہ انہیں کار بم دھماکے میں ہلاک کر دیا جائے گا۔ ذرائع کے مطابق ایک سیاسی جماعت کے آفیشل اکاؤنٹ کو مظاہرین کو جمع کرنے اور احتجاج کی تنظیم کے لیے استعمال کیا گیا، جس پر حکومتِ پاکستان نے سخت نوٹس لیا ہے اور برطانیہ پر زور دیا ہے کہ وہ اپنی سرزمین کو پاکستان کے خلاف غیر مستحکم سرگرمیوں کے لیے استعمال نہ ہونے دے۔ وزارت خارجہ کے ترجمان طاہر حسین نے تصدیق کی کہ برطانوی قائم مقام ہیڈ آف مشن کو ڈیمارش جاری کیا گیا اور پاکستان نے امید ظاہر کی ہے کہ برطانیہ ایسے شرپسند عناصر کے خلاف فوری اور سخت کارروائی کرے گا تاکہ قانون کے مطابق انہیں جوابدہ ٹھہرایا جا سکے۔
برطانوی ڈپٹی ہیڈ آف مشن وزارت خارجہ طلب، بریڈفورڈ احتجاج پر ڈیمارش
Date:
