محکمہ موسمیات نے کراچی میں موسمِ سرما کی پہلی بارش کی پیشگوئی کرتے ہوئے بتایا ہے کہ 28 دسمبر سے مغربی ہواؤں کا ایک نیا سلسلہ ملک کے بالائی علاقوں کو متاثر کرے گا، جو منگل سے بدھ کے دوران کراچی پر بھی اثر انداز ہونے کا امکان رکھتا ہے۔
محکمہ موسمیات کے مطابق کراچی میں 30 دسمبر کو موسم سرما کی پہلی بارش متوقع ہے، جس کے باعث شہر میں سردی کی شدت میں مزید اضافہ ہو سکتا ہے، جبکہ گزشتہ 24 گھنٹوں کے دوران شہر میں کم سے کم درجہ حرارت 11 ڈگری سینٹی گریڈ ریکارڈ کیا گیا ہے۔
آئندہ 24 گھنٹوں کے دوران دن کے وقت موسم خشک رہنے جبکہ رات کے اوقات میں خنک موسم کا امکان ظاہر کیا گیا ہے، آج زیادہ سے زیادہ درجہ حرارت 26 سے 28 ڈگری سینٹی گریڈ کے درمیان رہنے کی توقع ہے، ہوا میں نمی کا تناسب 66 فیصد ریکارڈ کیا گیا ہے اور شمال مشرق کی سمت سے ہلکی رفتار کی ہوائیں چل رہی ہیں۔
دوسری جانب ملک کے بالائی علاقوں میں شدید سردی کی لہر بدستور جاری ہے جہاں استور میں کم سے کم درجہ حرارت منفی 14، اڑنگ کیل میں منفی 7، گلگت اور چترال میں منفی 4، کوئٹہ میں منفی 3، اسلام آباد اور لاہور میں 7 جبکہ پشاور میں کم سے کم درجہ حرارت 8 ڈگری سینٹی گریڈ ریکارڈ کیا گیا ہے، جب کہ شمالی بلوچستان اور دیگر بالائی علاقوں میں موسم سرما کی پہلی بارش کے باعث سردی میں نمایاں اضافہ دیکھنے میں آیا ہے۔
