خیبر پختونخوا کے ضلع باجوڑ میں سکیورٹی فورسز نے خفیہ اطلاعات کی بنیاد پر ایک اہم اور کامیاب آپریشن کیا، جس کے دوران بھارتی اسپانسرڈ خوارج کی موجودگی کی اطلاع پر فورسز نے بروقت کارروائی عمل میں لائی۔
پاک فوج کے شعبہ تعلقات عامہ (آئی ایس پی آر) کے مطابق خار باجوڑ کے علاقے میں کیے گئے اس آپریشن کے دوران دہشت گردوں کی جانب سے شدید فائرنگ کی گئی، جس پر سکیورٹی فورسز نے بھرپور اور مؤثر جواب دیا۔
فائرنگ کے اس شدید تبادلے کے نتیجے میں بھارتی اسپانسرڈ پانچ خوارج ہلاک کر دیے گئے، جو طویل عرصے سے سکیورٹی فورسز اور معصوم شہریوں کے خلاف دہشت گردانہ کارروائیوں میں ملوث تھے۔
آئی ایس پی آر نے بتایا کہ اسی جھڑپ کے دوران پاک فوج کے بہادر افسر میجر عدیل زمان شہادت کے عظیم مرتبے پر فائز ہو گئے، جن کا تعلق ڈیرہ اسماعیل خان سے تھا۔
ترجمان کے مطابق میجر عدیل زمان نے آپریشن کے دوران فرنٹ سے اپنے جوانوں کی قیادت کی اور دشمن کے سامنے ڈٹ کر بہادری سے لڑتے ہوئے جامِ شہادت نوش کیا۔
آئی ایس پی آر کا مزید کہنا ہے کہ ہلاک ہونے والے خوارج کے قبضے سے بھاری مقدار میں اسلحہ اور گولہ بارود بھی برآمد کیا گیا، جو اس بات کا واضح ثبوت ہے کہ وہ ملک میں بدامنی پھیلانے کی منظم کوششوں میں سرگرم تھے۔
بیان میں یہ بھی بتایا گیا کہ مارے گئے دہشت گرد نہ صرف سکیورٹی فورسز پر حملوں میں ملوث تھے بلکہ معصوم شہریوں کے قتل جیسے سنگین جرائم میں بھی شامل رہے، جبکہ علاقے میں امن و امان کی مکمل بحالی کے لیے کلیئرنس اور سرچ آپریشن جاری رکھا گیا ہے۔a
