گلگت بلتستان کے علاقے برزل پاس میں برف کا تودہ گرنے کے نتیجے میں پاک فوج کے کیپٹن اور ایک سپاہی سمیت تین افراد شہید ہو گئے۔
پاک فوج کے شعبہ تعلقات عامہ (آئی ایس پی آر) کے مطابق برف ہٹانے کا آپریشن کیپٹن اسمد کی نگرانی میں جاری تھا کہ 3 جنوری کی رات تقریباً دو بجے آپریشن کے دوران اچانک برف کا تودہ آ گرا۔
آئی ایس پی آر نے بتایا کہ اس افسوسناک واقعے میں کیپٹن اسمد، سپاہی رضوان اور مشین آپریٹر عیسیٰ شہید ہو گئے۔
بیان کے مطابق 28 سالہ کیپٹن اسمد کا تعلق لاہور، سپاہی رضوان کا تعلق اٹک جبکہ شہید مشین آپریٹر شہری عیسیٰ کا تعلق استور سے تھا۔
آئی ایس پی آر کا کہنا ہے کہ شدید موسمی حالات اور سخت کوششوں کے باوجود تینوں افراد کو تودے کے نیچے سے نکالا گیا تاہم ان کی حالت تشویشناک تھی اور وہ جانبر نہ ہو سکے۔
فوج کے مطابق شہداء نے خراب موسم کے باوجود فورسز کی آپریشنل نقل و حرکت کو یقینی بنانے کے لیے ڈیوٹی انجام دیتے ہوئے اپنی جانوں کا نذرانہ پیش کیا۔
