امریکی فوج نے وینزویلا کے دارالحکومت سمیت مختلف علاقوں میں کارروائیاں کرتے ہوئے فضائی حملے کیے، جن کے دوران صدر نکولس مادورو اور ان کی اہلیہ کو گرفتار کر کے ملک سے باہر منتقل کیا گیا
امریکی طیاروں کے حملے کے نتیجے میں دارالحکومت کاراکس میں متعدد دھماکوں کی آوازیں سنی گئیں جبکہ شہر کے مختلف حصوں میں جنگی طیاروں کی نچلی پروازیں بھی دیکھی گئیں۔
امریکی میڈیا کے مطابق ان حملوں کا حکم امریکی صدر ڈونلڈ ٹرمپ نے دیا، جبکہ ابتدائی اطلاعات کے مطابق کاراکس میں کم از کم سات دھماکے ہوئے اور حملے میرانڈا، آراگوا اور لاگویرا ریاستوں تک پھیلے ہوئے تھے۔
وینزویلا کی حکومت کا مؤقف ہے کہ امریکی کارروائیوں کا مقصد ملک کے تیل اور معدنی وسائل پر قبضہ کرنا ہے، تاہم حکومت نے واضح کیا ہے کہ امریکا اپنے عزائم میں کامیاب نہیں ہوگا اور امریکی فوجی جارحیت کو مسترد کیا جاتا ہے۔
حملوں کے بعد صدر کی جانب سے ملک میں ایمرجنسی نافذ کرنے کا اعلان بھی کیا گیا۔ دوسری جانب روسی میڈیا نے دعویٰ کیا ہے کہ امریکی حملوں میں وینزویلا کے دفاعی ہیڈکوارٹرز کو نشانہ بنایا گیا جبکہ بعض وینزویلا کے جزائر میں امریکی میرینز کے ممکنہ زمینی آپریشن کی غیرمصدقہ اطلاعات بھی موصول ہو رہی ہیں۔
اسی تناظر میں کولمبیا کے صدر نے کہا ہے کہ کاراکس پر میزائل داغے جا رہے ہیں اور ان حملوں کے پیش نظر اقوام متحدہ کی سلامتی کونسل کا ہنگامی اجلاس بلایا جانا چاہیے۔
امریکی صدر ڈونلڈ ٹرمپ نے اس بات کی تصدیق کی ہے کہ وینزویلا کے صدر اور ان کی اہلیہ کو گرفتار کر کے ملک سے باہر منتقل کر دیا گیا ہے، جبکہ امریکی میڈیا کے مطابق یہ کارروائی امریکی فوج کے اعلیٰ اسپیشل یونٹ ڈیلٹا فورس نے انجام دی۔
مزید بتایا گیا ہے کہ امریکی اٹارنی جنرل کی جانب سے 7 اگست 2025 کو صدر مادورو کی گرفتاری پر 50 ملین ڈالر انعام کا اعلان کیا گیا تھا۔
امریکی ریپبلکن سینیٹر مائیک لی نے دعویٰ کیا ہے کہ امریکی وزیر خارجہ مارکو روبیو سے ٹیلی فون پر گفتگو میں انہیں بتایا گیا کہ نکولس مادورو کو مجرمانہ الزامات کے تحت مقدمہ چلانے کے لیے گرفتار کیا گیا ہے، تاہم مارکو روبیو کے مطابق امریکا وینزویلا میں مزید کسی کارروائی کا ارادہ نہیں رکھتا۔
