پاکستان نے سری لنکا کے خلاف تین میچوں کی ٹی ٹوئنٹی سیریز کے پہلے میچ میں شاندار کھیل کا مظاہرہ کرتے ہوئے میزبان ٹیم کو 6 وکٹوں سے شکست دے دی۔
یہ میچ دمبولا میں کھیلا گیا جہاں سری لنکا نے پہلے بیٹنگ کرتے ہوئے 19.2 اوورز میں 128 رنز بنائے۔ جنتھ لیاناجے نے 40 رنز کی اننگز کھیل کر ٹیم کی جانب سے مزاحمت کی جبکہ ونندو ہسرنگا 18 رنز بنانے میں کامیاب رہے۔
پاکستان کی جانب سے ابرار احمد اور سلمان مرزا نے عمدہ بولنگ کرتے ہوئے تین، تین وکٹیں حاصل کیں جبکہ شاداب خان نے دو کھلاڑیوں کو پویلین واپس بھیجا۔
129 رنز کے ہدف کے تعاقب میں پاکستان نے پراعتماد بیٹنگ کا مظاہرہ کیا اور 16.4 اوورز میں چار وکٹوں کے نقصان پر مطلوبہ ہدف حاصل کر لیا۔
اوپنر صاحبزادہ فرحان نے 51 رنز کی شاندار اننگز کھیلی جبکہ سائم ایوب نے 24 رنز کے ساتھ ٹیم کو مضبوط آغاز فراہم کیا۔ کپتان شاداب خان 18 رنز کے ساتھ ناٹ آؤٹ رہے اور ٹیم کو فتح سے ہمکنار کیا۔
سری لنکا کی جانب سے ونندو ہسرنگا، مہیش تھیکشانا اور دھننجایا ڈی سلوا نے ایک ایک وکٹ حاصل کی تاہم وہ پاکستان کی تیز رفتار بیٹنگ کو روکنے میں ناکام رہے۔
اس فتح کے ساتھ پاکستان نے تین میچوں کی سیریز میں 0-1 کی برتری حاصل کر لی ہے جبکہ اگلا میچ شائقین کرکٹ کے لیے خصوصی دلچسپی کا باعث بن گیا ہے۔
