بھارت میں مسلمانوں اور دیگر اقلیتی برادریوں کے خلاف منظم جبر اور نسل کشی کی ریاستی پالیسی ایک بار پھر بے نقاب ہو گئی ہے۔
مودی راج میں ریاستی ادارے کھلے عام ہندوتوا ایجنڈے کے تابع نظر آتے ہیں، جس کے باعث بھارتی جمہوریت اور آئینی اقدار شدید خطرے سے دوچار ہو چکی ہیں۔
بھارتی فلمی اداکار اور ہدایت کار پراکاش راج نے مودی حکومت اور آر ایس ایس کے گٹھ جوڑ کا پردہ فاش کرتے ہوئے سنگین انکشافات کیے ہیں۔
پراکاش راج کے مطابق مسلمانوں، قبائلیوں اور دیگر اقلیتوں کے خلاف ایک منظم ایجنڈے کے تحت کارروائیاں کی جا رہی ہیں اور حالات نسل کشی کی تیاری کی جانب بڑھتے دکھائی دے رہے ہیں۔
پراکاش راج کا کہنا ہے کہ بھارت میں اب انصاف میں تاخیر نہیں بلکہ انصاف سے مکمل انکار کیا جا رہا ہے، جبکہ غیرقانونی، جابرانہ اور بدعنوان پولیس نظام نے عوام کو تھانوں سے خوفزدہ کر دیا ہے۔ انہوں نے آر ایس ایس کو بھارت کے لیے اصل اور سب سے بڑا خطرہ قرار دیا۔
انہوں نے نشاندہی کی کہ بھارتی وزیر اعظم نریندر مودی کی موجودگی میں رام مندر میں پرچم کشائی کا واقعہ بی جے پی اور آر ایس ایس کے گہرے گٹھ جوڑ کا واضح ثبوت ہے، جو ریاست اور مذہبی انتہا پسندی کے امتزاج کو ظاہر کرتا ہے۔
سیاسی و آئینی ماہرین کے مطابق بی جے پی اور آر ایس ایس آئین میں تبدیلی اور جمہوری اقدار کے قتل کے ذریعے اپنا انتہا پسند ایجنڈا پہلے ہی واضح کر چکی ہیں۔
ماہرین کا کہنا ہے کہ مودی کے اقتدار میں آنے کے بعد بھارتی جمہوریت عملی طور پر ایک فریب میں تبدیل ہو چکی ہے، جہاں اقلیتوں کے حقوق اور شہری آزادیوں کو مسلسل پامال کیا جا رہا ہے۔
