چیف آف ڈیفنس فورسز فیلڈ مارشل سید عاصم منیر نے واضح کیا ہے کہ قومی سلامتی کو لاحق کسی بھی خطرے کے حوالے سے زیرو ٹالرنس پالیسی اپنائی گئی ہے اور ملک کی خودمختاری و علاقائی سالمیت کا تحفظ پاک فوج کا اولین مشن ہے۔
آئی ایس پی آر کے مطابق فیلڈ مارشل سید عاصم منیر نے لاہور گیریژن کا دورہ کیا جہاں انہیں فارمیشن کی آپریشنل تیاریوں پر تفصیلی بریفنگ دی گئی۔
دورے کے دوران انہوں نے فارمیشن کے زیرِ اہتمام جاری تربیتی مشقوں کا بھی جائزہ لیا اور مستقبل کی جنگوں کے تقاضوں کے پیش نظر تیاریوں میں جدت اور جدید حکمتِ عملی اپنانے پر زور دیا۔
فیلڈ مارشل نے جوانوں کو فراہم کی جانے والی کھیلوں اور تفریحی سہولتوں کو سراہتے ہوئے کہا کہ جسمانی فٹنس اور بلند مورال کسی بھی پیشہ ور فوج کی بنیادی ضرورت ہے۔
آئی ایس پی آر کے مطابق چیف آف ڈیفنس فورسز نے سی ایم ایچ لاہور میں قائم ہائی کیئر سینٹر کا بھی دورہ کیا جہاں انہوں نے طبی عملے اور انتظامیہ کی پیشہ ورانہ خدمات کو خراجِ تحسین پیش کیا۔
لاہور گیریژن میں افسران سے خطاب کرتے ہوئے فیلڈ مارشل سید عاصم منیر نے کہا کہ پاک فوج ہر قسم کے چیلنجز سے نمٹنے کے لیے مکمل طور پر پرعزم ہے۔
انہوں نے اس عزم کا اعادہ کیا کہ پاکستان کی مسلح افواج ملک کی خودمختاری، علاقائی سالمیت اور داخلی استحکام کے تحفظ کے لیے ثابت قدم رہیں گی۔
فیلڈ مارشل کا کہنا تھا کہ افواجِ پاکستان اعلیٰ پیشہ ورانہ معیار، مضبوط نظم و ضبط اور بے لوث قومی خدمت کی اقدار کو فروغ دے رہی ہیں۔
انہوں نے مزید کہا کہ پاک فوج جدید تقاضوں سے ہم آہنگ ہونے کی بھرپور صلاحیت رکھتی ہے اور جوانوں کی تربیت، فٹنس اور مورال کو ترجیحی بنیادوں پر یقینی بنایا جا رہا ہے۔
