پاکستان نے غزہ میں پائیدار امن قائم کرنے کے لیے امریکی سربراہی میں قائم بورڈ آف پیس میں شمولیت کی دعوت قبول کر لی ہے۔ امریکی صدر ڈونلڈ ٹرمپ کی جانب سے وزیراعظم شہباز شریف کو بورڈ میں شامل ہونے کی دعوت دی گئی تھی۔
ترجمان دفتر خارجہ کے مطابق پاکستان نے اقوام متحدہ کی سلامتی کونسل کی قرارداد 2803 کے تحت غزہ امن منصوبے کی حمایت کا اعلان کیا ہے۔
بورڈ آف پیس کا مقصد غزہ میں مستقل جنگ بندی کے لیے عملی اقدامات کرنا ہے۔ پاکستان نے فلسطینی عوام کے لیے انسانی امداد میں اضافے کی ضرورت پر زور دیا اور غزہ کی تعمیر نو کے عمل کو مؤثر بنانے کی امید ظاہر کی۔
پاکستان نے فلسطینی عوام کے حقِ خود ارادیت کی بھرپور حمایت کا اعادہ کیا اور کہا کہ یہ حمایت آزاد و خودمختار فلسطینی ریاست کے قیام تک جاری رہے گی۔
ترجمان دفتر خارجہ کے مطابق پاکستان کا مؤقف ہے کہ فلسطینی ریاست 1967 سے قبل کی سرحدوں پر مشتمل ہو اور القدس الشریف اس کا دارالحکومت ہو۔ پاکستان نے کہا کہ بورڈ آف پیس کے پلیٹ فارم سے امن کے لیے عملی پیش رفت کی توقع ہے۔
خیال رہے کہ امریکی صدر ٹرمپ نے 17 جنوری کو اپنی سربراہی میں غزہ بورڈ آف پیس کا اعلان کیا تھا، جس میں امریکی وزیر خارجہ مارکو روبیو، مشرق وسطیٰ میں ٹرمپ کے نمائندے اسٹیو وٹکوف، ورلڈ بینک کے صدر اجے بنگا، ڈونلڈ ٹرمپ کے داماد جیراڈ کوشنر، سابق برطانوی وزیراعظم ٹونی بلیئر اور دیگر شامل ہیں۔
غزہ میں بورڈ آف پیس کا قیام ٹرمپ کے امن منصوبے کا حصہ ہے، جس کا مقصد سیکیورٹی، انسانی امداد، اور تعمیر نو کے منصوبوں میں ہم آہنگی کو یقینی بنانا اور فلسطینی اتھارٹی و حکومت میں اصلاحات کے لیے راہ ہموار کرنا ہے۔
