ابوظہبی: صدرِ مملکت آصف علی زرداری چار روزہ سرکاری دورے پر متحدہ عرب امارات کے دارالحکومت ابوظہبی پہنچ گئے۔
ابوظہبی کے زاید انٹرنیشنل ایئرپورٹ کے پریذیڈنشل فلائٹ ٹرمنل پر متحدہ عرب امارات کے وزیرِ انصاف عبد اللہ بن سلطان بن عواد النعیمی نے صدرِ مملکت کا استقبال کیا۔
اس موقع پر خاتونِ اوّل بی بی آصفہ بھٹو زرداری اور وفاقی وزیرِ داخلہ محسن نقوی بھی صدرِ مملکت کے ہمراہ تھے، جبکہ متحدہ عرب امارات میں پاکستان کے سفیر شفقت علی خان بھی استقبالی تقریب میں موجود تھے۔
ذرائع کے مطابق صدرِ مملکت کا یہ دورہ 29 جنوری 2026 تک جاری رہے گا۔ دورے کے دوران صدر آصف علی زرداری متحدہ عرب امارات کی اعلیٰ قیادت سے ملاقاتیں کریں گے، جن میں دوطرفہ تعلقات کے تمام پہلوؤں کا تفصیلی جائزہ لیا جائے گا۔
ملاقاتوں میں تجارت، اقتصادی شراکت داری، دفاع، سلامتی اور عوامی روابط کے فروغ پر تبادلۂ خیال متوقع ہے۔ ایوانِ صدر کے مطابق یہ دورہ پاکستان اور متحدہ عرب امارات کے مابین برادرانہ تعلقات کو مزید مضبوط بنانے اور شراکت داری کے عزم کا عکاس ہے۔
