بنگلا دیش کی آئی سی سی ورلڈکپ سے بے دخلی کے بعد پاکستان کرکٹ بورڈ نے احتجاجی حکمتِ عملی پر غور شروع کر دیا
ذرائع کے مطابق پاکستان کرکٹ بورڈ (پی سی بی) نے بنگلا دیش کو آئی سی سی ورلڈکپ سے باہر کیے جانے کے فیصلے کے خلاف احتجاج کے لیے مختلف آپشنز زیرِ غور لانا شروع کر دیے ہیں۔
ذرائع کا کہنا ہے کہ پاکستان 15 فروری کو کولمبو میں ہونے والے بھارت کے خلاف میچ کے بائیکاٹ کا آپشن بھی رکھتا ہے۔ اس صورت میں میچ نہ کھیلنے پر پاکستان کے صرف دو پوائنٹس کٹنے کا امکان ہے۔
ذرائع کے مطابق پی سی بی کے پاس بھارت کے خلاف میچ نہ کھیلنے کا مکمل اختیار موجود ہے، جبکہ اس فیصلے سے آئی سی سی کو بھاری مالی نقصان بھی اٹھانا پڑ سکتا ہے۔
ذرائع نے مزید بتایا کہ اگر پاکستان ورلڈکپ میں شرکت کا فیصلہ کرتا ہے تو اس کے باوجود احتجاج کے تمام آپشنز کھلے رکھے جائیں گے۔
واضح رہے کہ ٹی ٹوئنٹی ورلڈکپ میں بنگلا دیش نے سیکیورٹی خدشات کی بنیاد پر بھارت جانے سے انکار کیا تھا اور اپنے تمام میچز سری لنکا منتقل کرنے کی درخواست آئی سی سی سے کی تھی۔
تاہم آئی سی سی نے بنگلا دیش کرکٹ بورڈ کی درخواست مسترد کرتے ہوئے اس کی جگہ اسکاٹ لینڈ کو گروپ میں شامل کر لیا تھا۔
