امریکی صدر ڈونلڈ ٹرمپ نے کہا ہے کہ امریکا نے ایران کی جانب بحری بیڑا روانہ کیا ہے تاہم امید ہے کہ اسے استعمال کرنے کی ضرورت پیش نہیں آئے گی۔
صحافیوں سے گفتگو میں صدر ٹرمپ کا کہنا تھا کہ اس وقت امریکا کے متعدد بڑے اور طاقتور جہاز ایران کی سمت بڑھ رہے ہیں، لیکن وہ چاہتے ہیں کہ ایران کے خلاف کسی فوجی کارروائی کی نوبت نہ آئے۔
انہوں نے بتایا کہ امریکا ایران کے ساتھ مزید مذاکرات کا خواہاں ہے اور ماضی میں بھی دونوں ممالک کے درمیان بات چیت ہو چکی ہے جو آئندہ بھی جاری رہ سکتی ہے۔
چین سے متعلق اظہار خیال کرتے ہوئے امریکی صدر نے کہا کہ برطانیہ کے لیے چین کے ساتھ کاروباری تعلقات انتہائی خطرناک ثابت ہو سکتے ہیں اور یہ تجارتی تعاون سنگین نتائج کا باعث بن سکتا ہے۔
ان کا کہنا تھا کہ کینیڈا کے لیے چین سے تجارت اس سے بھی زیادہ خطرناک ہے، اس لیے اتحادی ممالک کو بیجنگ کے ساتھ بڑھتے معاشی روابط پر محتاط رہنا چاہیے۔
کیوبا کے حوالے سے صدر ٹرمپ نے رائے دی کہ ان کے خیال میں موجودہ کیوبن حکومت زیادہ عرصے تک برقرار نہیں رہ سکے گی۔
