پاکستان آرمی ٹیم اسپرٹ مقابلہ 2026 کی نویں بین الاقوامی مشق کی افتتاحی تقریب نیشنل کاؤنٹر ٹیررازم سینٹر پبی میں منعقد ہوئی۔ اس مشق کا مقصد دوست ممالک کی افواج کے درمیان فوجی تعاون کو فروغ دینا ہے۔
افتتاحی تقریب میں ایک سینئر فوجی افسر نے شرکت کی، جس کے ساتھ ہی 60 گھنٹوں پر مشتمل پیٹرولنگ ایکسرسائز کا باضابطہ آغاز بھی ہو گیا۔
مشق میں 19 دوست ممالک کی 24 بین الاقوامی ٹیمیں اور فوجی مبصرین حصہ لے رہے ہیں۔ شریک ممالک میں بحرین، بنگلہ دیش، بیلاروس، مصر، عراق، اردن، سعودی عرب، ملائیشیا، مالدیپ، مراکش، نیپال، قطر، سری لنکا، ترکیہ، امریکا اور ازبکستان شامل ہیں، جب کہ انڈونیشیا، میانمار اور تھائی لینڈ بطور مبصر شریک ہیں۔
اس کے علاوہ پاکستان آرمی اور پاکستان نیوی کی 16 ملکی ٹیمیں بھی مشق میں حصہ لے رہی ہیں، جبکہ پاکستان ایئر فورس کے مبصرین بھی اس مشق کا حصہ ہیں۔
پاکستان آرمی ٹیم اسپرٹ ایک مشن مخصوص اور ٹاسک پر مبنی پیشہ ورانہ فوجی مشق ہے، جس کا انعقاد ہر سال پاکستان میں کیا جاتا ہے۔
اس مشق میں جسمانی فٹنس، ذہنی مضبوطی اور عسکری مہارت کے اعلیٰ معیار کی ضرورت ہوتی ہے، جب کہ شرکاء کو حقیقی آپریشنل ماحول سے قریب تر حالات میں ذیلی عسکری مشنز کے دوران فوری فیصلے کرنے کی صلاحیت کا مظاہرہ کرنا ہوتا ہے۔
اس مشق کا بنیادی مقصد ٹیم اسپرٹ کے ذریعے استقامت کو فروغ دینا ہے۔ اس کے ساتھ ساتھ یہ مشق بنیادی فوجی اوصاف کو نکھارنے اور شریک افواج کے درمیان جدید خیالات اور بہترین تجربات کے تبادلے کے ذریعے باہمی ہم آہنگی کو بہتر بنانے میں مدد فراہم کرتی ہے۔
