آئی سی سی ٹی ٹوئنٹی ورلڈ کپ کے گروپ مرحلے کے آٹھویں میچ میں زمبابوے نے عمان کو 8 وکٹوں سے شکست دے کر ایونٹ میں اہم کامیابی حاصل کر لی۔
کولمبو میں کھیلے گئے میچ میں زمبابوے کے کپتان سکندر رضا نے ٹاس جیت کر عمان کو پہلے بیٹنگ کی دعوت دی۔ عمان کی ٹیم مقررہ 20 اوورز بھی مکمل نہ کر سکی اور 19.5 اوورز میں 103 رنز پر آل آؤٹ ہوگئی۔ عمان کی جانب سے ندیم خان 20 رنز کے ساتھ نمایاں رہے۔
زمبابوے کے بولرز نے سازگار کنڈیشنز کا بھرپور فائدہ اٹھاتے ہوئے پاور پلے میں ہی 4 وکٹیں حاصل کیں اور حریف ٹیم کو ابتدائی دباؤ میں لے آئے۔ بلیسنگ مزارابانی اور بریڈ ایونز نے 3، 3 وکٹیں حاصل کیں، جبکہ رچرڈ نگاراوا نے بھی 3 کھلاڑیوں کو آؤٹ کیا۔ کپتان سکندر رضا نے ایک وکٹ اپنے نام کی۔
104 رنز کا ہدف زمبابوے کے لیے آسان ثابت ہوا اور ٹیم نے مطلوبہ اسکور 13.3 اوورز میں صرف 2 وکٹوں کے نقصان پر حاصل کر لیا۔ اوپنر برائن برینٹ نے 48 رنز کی عمدہ اننگز کھیلی، برینڈن ٹیلر 31 رنز کے ساتھ ریٹائر ہرٹ ہوئے، مرومانی نے 21 رنز بنائے جبکہ سکندر رضا 5 رنز کے ساتھ ناٹ آؤٹ رہے۔
