وزیراعلیٰ پنجاب مریم نواز نے بلوچستان کے دورے کے موقع پر سکیورٹی فورسز کے لیے 10 ارب روپے کی مالی معاونت کا اعلان کیا ہے۔
انہوں نے کوئٹہ میں ایف سی ہیڈکوارٹر میں منعقدہ تقریب میں شرکت کی، جہاں سکیورٹی صورتحال اور دہشت گردی کے خلاف جاری اقدامات پر بریفنگ دی گئی۔
اس سے قبل وزیراعلیٰ پنجاب نے وزیراعلیٰ سیکرٹریٹ کا دورہ کیا، جہاں وزیراعلیٰ بلوچستان سرفراز بگٹی نے صوبائی کابینہ اور اراکین اسمبلی کے ہمراہ ان کا استقبال کیا۔
تقریب سے خطاب کرتے ہوئے مریم نواز کا کہنا تھا کہ بلوچستان کے عوام کا جذبہ حب الوطنی اور پاکستان سے وابستگی قابلِ ستائش ہے۔
انہوں نے کہا کہ بلوچستان کو درپیش چیلنجز سے نمٹنے کے لیے حکومت پنجاب ہر ممکن تعاون فراہم کرے گی۔ ان کا کہنا تھا کہ دہشت گردی کا خاتمہ قومی یکجہتی اور مشترکہ کوششوں سے ہی ممکن ہے، اور پنجاب بلوچستان کے ساتھ کھڑا ہے۔
وزیراعلیٰ پنجاب نے مزید کہا کہ بلوچستان کو “فتنہ الخوارج” جیسے عناصر کا سامنا ہے اور ان کے خلاف آپریشن میں ہر ممکن مدد فراہم کی جائے گی۔ انہوں نے اس عزم کا اظہار کیا کہ بلوچستان میں امن، استحکام اور خوشحالی کا قیام اولین ترجیح ہے۔
اس موقع پر وزیراعلیٰ بلوچستان سرفراز بگٹی نے مریم نواز کا خیرمقدم کرتے ہوئے کہا کہ سکیورٹی فورسز کے لیے 10 ارب روپے کی معاونت ایک مثبت اور قابلِ تحسین اقدام ہے۔
انہوں نے کہا کہ بلوچستان میں حکومت اور اپوزیشن عوامی فلاح و بہبود کے لیے متحد ہیں اور صوبے میں امن کے قیام کے لیے مشترکہ کوششیں جاری رہیں گی۔
