ممبر اسلامی نظریاتی کونسل اور چیئرمین امام خمینی ٹرسٹ علامہ سید افتخار حسین نقوی نے وفد کے ہمراہ جامعۃ مسجد و امام بارگاہ خدیجۃ الکبری ترلائی کا دورہ کیا، جہاں انہوں نے حالیہ واقعے کے شہداء کے لواحقین اور امام مسجد علامہ بشارت امامی سے ملاقات کر کے تعزیت کا اظہار کیا۔
وفد میں مولانا محمد علی صابری، مولانا ڈاکٹر محمد نقی، سید شاہد اور شاہد علی جعفری شامل تھے۔ اس موقع پر علامہ سید افتخار حسین نقوی نے شہداء کے درجات کی بلندی کے لیے دعا کی اور سوگوار خاندانوں سے دلی ہمدردی و یکجہتی کا اظہار کیا۔
میڈیا سے گفتگو کرتے ہوئے انہوں نے کہا کہ شہداء نے دین اسلام کی بقا کے لیے اپنی جانوں کا نذرانہ پیش کیا۔ ان کا کہنا تھا کہ حکومت تکفیری عناصر کے خلاف مؤثر کارروائی کرے اور دہشتگردوں کی جانب سے معاشرے میں تفریق پیدا کرنے کی کوششوں کو ناکام بنایا جائے۔
انہوں نے کہا کہ دشمن عناصر ملک کو کمزور کرنے کے لیے بزدلانہ کارروائیاں کر رہے ہیں تاہم قوم متحد ہے اور ایسے ہتھکنڈوں سے مرعوب نہیں ہوگی۔
اس موقع پر علامہ بشارت امامی نے کہا کہ دہشتگرد اپنے ناپاک عزائم میں کبھی کامیاب نہیں ہوں گے۔ انہوں نے کہا کہ بزدل دہشتگردوں نے جمعہ کے اجتماع کو نشانہ بنایا، تاہم آئندہ جمعہ بھی اسی امام بارگاہ میں نماز جمعہ ادا کر کے دشمن کو واضح پیغام دیا جائے گا کہ قوم کے حوصلے بلند ہیں۔
دورے کے اختتام پر علامہ سید افتخار حسین نقوی نے شہداء کی قبروں پر حاضری دی، فاتحہ خوانی کی اور درجات کی بلندی کے لیے خصوصی دعا کی۔
