پاک فوج کے شعبہ تعلقات عامہ (آئی ایس پی آر) کے مطابق ظہیر احمد بابر سدھو، چیف آف ایئر اسٹاف، پاک فضائیہ نے اپنے سرکاری دورہ انڈونیشیا کے دوران صدر پربووو سوبیانتو سے ملاقات کی۔
ملاقات میں ایئر چیف نے پاکستان اور انڈونیشیا کے درمیان مشترکہ اقدار، تاریخی برادرانہ تعلقات اور دفاعی اشتراک کو مزید فروغ دینے کی ضرورت پر زور دیا۔
صدر پربووو نے پاکستان ایئر فورس کے جدید تربیتی نظام اور ایرو اسپیس ترقیاتی ڈھانچے سے استفادہ کرتے ہوئے انڈونیشیا کی دفاعی صلاحیتوں میں اضافہ کرنے میں گہری دلچسپی کا اظہار کیا۔
دورے کے دوران ایئر چیف نے انڈونیشیا کے وزیر دفاع لیفٹیننٹ جنرل (ر) سجافری سجامس الدین، مسلح افواج کے سربراہ اور انڈونیشین فضائیہ کے اعلیٰ حکام سے بھی الگ الگ اعلیٰ سطحی ملاقاتیں کیں۔ انہیں تمام مقامات پر گارڈ آف آنر پیش کیا گیا۔
انڈونیشین فضائیہ کے سربراہ کے ساتھ گفتگو میں دونوں جانب سے فضائیہ سے فضائیہ تعاون بڑھانے، بنیادی سے اعلیٰ سطح تک مشترکہ تربیت، پیشہ ورانہ تبادلے اور ابھرتے ہوئے ایرو اسپیس شعبوں میں اشتراک پر اتفاق کیا گیا۔
انڈونیشین قیادت نے پاک فضائیہ کے جنگی تجربے کو سراہتے ہوئے آپریشنل اور فلائنگ ٹریننگ میں معاونت کی درخواست بھی کی۔
دو طرفہ فضائی تعاون کو مضبوط بنانے میں نمایاں کردار ادا کرنے پر ایئر چیف مارشل ظہیر احمد بابر سدھو کو انڈونیشین فضائیہ کے اعلیٰ ترین اعزاز میڈل آف آنر سے بھی نوازا گیا۔
بعد ازاں ایئر چیف نے انڈونیشین وزیر دفاع اور چیف آف ڈیفنس فورسز کے ساتھ مشترکہ اجلاس میں دفاع اور سیکیورٹی سے متعلق وسیع امور پر تبادلہ خیال کیا۔
انڈونیشین قیادت نے پاک فضائیہ کی پیشہ ورانہ مہارت، جدیدیت کی پالیسی اور نیشنل ایرو اسپیس سائنس اینڈ ٹیکنالوجی پارک کے جدید تکنیکی ڈھانچے کو بھی سراہا۔
یہ دورہ دونوں ممالک کے درمیان دفاعی شراکت داری اور فضائی تعاون کے ایک نئے باب کا پیش خیمہ قرار دیا جا رہا ہے۔
