وزیراعظم ہاؤس میں منعقدہ تقریب کے دوران سیکرٹری بینظیر انکم سپورٹ پروگرام (بی آئی ایس پی) نے بریفنگ دیتے ہوئے بتایا کہ رواں سال رمضان پیکج کی رقم بڑھا کر 13 ہزار روپے کر دی گئی ہے۔ انہوں نے کہا کہ اس اقدام کا بنیادی مقصد مستحق افراد کو باعزت اور شفاف انداز میں مالی معاونت فراہم کرنا ہے۔
بریفنگ میں مزید بتایا گیا کہ گزشتہ برس 2025 میں رمضان پیکج کے تحت فی خاندان 5 ہزار روپے دیے گئے تھے، جبکہ اس سال امدادی رقم مستحقین کو براہِ راست بینکوں کے ذریعے منتقل کی جائے گی تاکہ شفافیت کو یقینی بنایا جا سکے۔
حکومتی اعلامیے کے مطابق 38 ارب روپے کے اس پیکج کی نگرانی وزرا پر مشتمل ایک خصوصی کمیٹی کرے گی، جبکہ وزیراعظم خود بھی اس عمل کی براہِ راست نگرانی کریں گے۔
تقریب سے خطاب کرتے ہوئے وزیراعظم شہباز شریف نے کہا کہ گزشتہ سال رمضان کے دوران 20 ارب روپے مختص کیے گئے تھے اور ڈیجیٹل نظام کے ذریعے مستحقین تک امداد پہنچائی گئی۔
انہوں نے کہا کہ اس سال پیکج کا حجم بڑھا کر 38 ارب روپے کر دیا گیا ہے تاکہ زیادہ سے زیادہ ضرورت مند خاندانوں کو ریلیف فراہم کیا جا سکے۔
وزیراعظم نے واضح کیا کہ چاروں صوبوں اور آزاد کشمیر میں امدادی رقم شفاف اور جدید نظام کے تحت تقسیم کی جائے گی، اور ہر مستحق خاندان کو 13 ہزار روپے فراہم کیے جائیں گے۔
