اسلام آباد: صدرِ مملکت آصف علی زرداری نے کراچی کے علاقے سولجر بازار میں عمارت منہدم ہونے کے افسوسناک واقعے پر گہرے دکھ اور افسوس کا اظہار کیا ہے۔
صدر مملکت نے جاں بحق افراد کے اہلِ خانہ سے دلی ہمدردی اور تعزیت کا اظہار کرتے ہوئے زخمیوں کو بہترین طبی سہولیات فراہم کرنے کی ہدایت کی ہے۔
انہوں نے متعلقہ اداروں کو ریسکیو آپریشن کی فوری اور مؤثر انجام دہی یقینی بنانے کا حکم دیا تاکہ ملبے تلے دبے افراد کو جلد از جلد نکالا جا سکے۔
صدر نے سندھ حکومت کو ہدایت کی کہ عمارتوں کی باقاعدہ جانچ پڑتال، گیس سلنڈرز کے محفوظ استعمال اور بلڈنگ کوڈز پر سختی سے عملدرآمد یقینی بنایا جائے تاکہ مستقبل میں ایسے سانحات سے بچا جا سکے۔
آصف علی زرداری نے مزید کہا کہ صوبائی حکومت واقعے کی ہر پہلو سے شفاف انکوائری کرے اور ذمہ داران کا تعین کر کے قانون کے مطابق کارروائی عمل میں لائے، تاکہ آئندہ ایسے واقعات کی روک تھام ممکن ہو سکے۔
