تہران/ماسکو: روس کا خصوصی کمانڈ اینڈ کنٹرول طیارہ، جسے غیر رسمی طور پر ’’ڈومز ڈے پلین‘‘ کہا جاتا ہے، تہران میں لینڈ کر گیا ہے۔
اس پیش رفت کو خطے میں بڑھتی ہوئی کشیدگی، خصوصاً امریکا اور ایران کے درمیان جاری تناؤ کے تناظر میں نہایت اہم قرار دیا جا رہا ہے۔
دفاعی ماہرین کے مطابق Ilyushin Il-80 روسی قیادت کے لیے ایک فضائی کمانڈ سینٹر کے طور پر تیار کیا گیا ہے، جو ایٹمی جنگ یا بڑے پیمانے کے عسکری بحران کی صورت میں بھی مواصلاتی نظام برقرار رکھنے کی صلاحیت رکھتا ہے۔
اس طیارے کو اس انداز میں ڈیزائن کیا گیا ہے کہ یہ ایٹمی دھماکے کے بعد پیدا ہونے والی برقی مقناطیسی لہروں سے بھی محفوظ رہ سکے اور اعلیٰ فوجی قیادت کو محفوظ فضائی پلیٹ فارم مہیا کرے۔
ذرائع کے مطابق یہ لینڈنگ ایک ایسے وقت میں ہوئی ہے جب ایران کی جانب سے ممکنہ پہلے جوہری تجربے کی قیاس آرائیاں زور پکڑ رہی ہیں۔
اگرچہ تہران نے باضابطہ طور پر کسی جوہری ہتھیار کے تجربے کا اعلان نہیں کیا، تاہم مغربی حلقوں میں اس حوالے سے تشویش پائی جا رہی ہے۔
تجزیہ کاروں کا کہنا ہے کہ روسی طیارے کی موجودگی کئی پہلوؤں کی نشاندہی کر سکتی ہے جن میں
روس اور ایران کے درمیان دفاعی تعاون میں اضافہ
خطے میں طاقت کے توازن سے متعلق اسٹریٹجک پیغام
کسی ممکنہ ہنگامی صورتِ حال کے لیے پیشگی تیاری
ماسکو یا تہران کی جانب سے اس لینڈنگ پر فوری طور پر کوئی تفصیلی سرکاری بیان جاری نہیں کیا گیا۔ تاہم عالمی مبصرین اسے مشرقِ وسطیٰ کی بدلتی ہوئی سکیورٹی صورتحال میں ایک اہم علامتی اور عملی پیش رفت قرار دے رہے ہیں۔
عالمی سفارتی حلقوں میں اس اقدام کو قریب سے مانیٹر کیا جا رہا ہے، کیونکہ اگر ایران کی جانب سے واقعی کسی جوہری تجربے کی تیاری کی جا رہی ہے تو اس کے خطے اور عالمی سیاست پر گہرے اثرات مرتب ہو سکتے ہیں۔
