لاہور:پاکستان ہاکی فیڈریشن (پی ایچ ایف) کے صدر محی الدین وانی نے قومی ہاکی ٹیم کی ٹریننگ اور آئندہ میچوں کی تیاریوں پر خصوصی توجہ دینے کی ہدایت کی ہے۔
لاہور میں قومی ٹیم کے کپتان عماد بٹ سے گفتگو کرتے ہوئے صدر پی ایچ ایف نے بتایا کہ ہاکی ورلڈ کپ کوالیفائر راؤنڈ کے سلسلے میں مصر میں تعینات پاکستانی سفیر کو بھی اعتماد میں لیا گیا ہے تاکہ ٹیم کو وہاں ہر ممکن سہولت فراہم کی جا سکے۔
انہوں نے کہا کہ ورلڈ کپ کوالیفائر راؤنڈ 28 فروری سے مصر میں شروع ہو رہا ہے اور کھلاڑیوں کو بہترین تیاری کے لیے تمام ضروری سہولیات فراہم کی جائیں گی۔
محی الدین وانی کا مزید کہنا تھا کہ قومی ٹیم کی کارکردگی میں بہتری کے لیے منظم تربیت، فٹنس اور حکمتِ عملی پر بھرپور توجہ دی جا رہی ہے تاکہ پاکستان ہاکی کو عالمی سطح پر دوبارہ نمایاں مقام دلایا جا سکے۔
