نئی دہلی: بھارت میں وزیرِاعظم مودی کی حکومت پر تعلیمی آزادی محدود کرنے اور جامعات میں اختلافِ رائے کو دبانے کے الزامات عائد کیے جا رہے ہیں۔ ناقدین کا کہنا ہے کہ مذہبی و نسلی اقلیتوں، تنقیدی آوازوں اور مختلف شناختی بیانیوں کو بڑھتی ہوئی پابندیوں کا سامنا ہے، جس سے داخلی تقسیم اور سماجی و سیاسی کشیدگی میں اضافہ ہو رہا ہے۔
بھارتی آن لائن جریدے دی وائر کی ایک رپورٹ کے مطابق ملک کے اعلیٰ تعلیمی اداروں میں سنسرشپ معمول بنتی جا رہی ہے۔ رپورٹ میں دعویٰ کیا گیا کہ انڈین انسٹی ٹیوٹ آف ٹیکنالوجی میں منعقدہ ایک کانفرنس کو شدید سیاسی دباؤ کا سامنا کرنا پڑا، جسے تعلیمی خودمختاری کے لیے تشویشناک مثال قرار دیا گیا۔
رپورٹ کے مطابق بھارت میں ذات پات، اقلیتوں کے حقوق، قوم پرستی یا ریاستی تشدد جیسے موضوعات پر تنقیدی نقطۂ نظر کو اکثر ’’سیاسی طور پر متحرک‘‘ قرار دے کر محدود کیا جاتا ہے۔ مزید کہا گیا کہ بھارتی کونسل آف سوشل سائنس ریسرچ جیسے عوامی فنڈنگ اداروں پر بھی حکومتی بیانیے سے ہم آہنگ رہنے کا دباؤ موجود ہے۔
ماہرینِ تعلیم اور سماجی تجزیہ کاروں کا کہنا ہے کہ جامعات میں آزادیٔ اظہار پر قدغنیں جمہوری اقدار کے لیے نقصان دہ ہیں اور علمی مباحث کو محدود کرنے سے تحقیق و تنقید کا ماحول متاثر ہوتا ہے۔ بعض ناقدین کے مطابق تعلیمی اداروں کو سیاسی اثر و رسوخ سے آزاد رکھنا ہی مضبوط جمہوریت کی بنیاد ہے۔
دوسری جانب حکومت اور اس کے حامی حلقے ان الزامات کو مسترد کرتے ہوئے مؤقف اختیار کرتے ہیں کہ تعلیمی اداروں میں نظم و ضبط اور قومی مفاد کے تقاضوں کو یقینی بنانا ریاست کی ذمہ داری ہے، جبکہ اظہارِ رائے کی آزادی آئینی حدود کے اندر برقرار ہے۔
مبصرین کا کہنا ہے کہ بھارت میں تعلیمی آزادی اور سیاسی بیانیے کے درمیان جاری یہ بحث آئندہ برسوں میں ملک کے جمہوری اور سماجی ڈھانچے پر اہم اثرات مرتب کر سکتی ہے۔
