میران شاہ: شمالی وزیرستان سے تعلق رکھنے والی دس سالہ آئنہ وزیر نے اپنی شاندار فاسٹ بولنگ سے ملک بھر کی توجہ حاصل کر لی۔ مقامی کرکٹ میچ کے دوران ان کی برق رفتار اور کنٹرولڈ بولنگ کی ویڈیو سوشل میڈیا پر وائرل ہوگئی جس کے بعد کرکٹ شائقین کی جانب سے زبردست پذیرائی سامنے آئی۔
مداحوں اور کرکٹ حلقوں نے آئنہ کی قدرتی رفتار، لائن و لینتھ پر عبور اور پراعتماد انداز کو غیر معمولی قرار دیتے ہوئے متعلقہ حکام اور اسپورٹس اداروں سے مطالبہ کیا کہ اس باصلاحیت بچی کی سرپرستی کی جائے اور اسے پیشہ ورانہ تربیت کے مواقع فراہم کیے جائیں۔
عوامی دلچسپی میں اضافے کے بعد جاوید آٖفریدی، چیئرمین پشاور زلمی، نے آئنہ وزیر کی غیر معمولی صلاحیتوں کو سراہتے ہوئے اعلان کیا ہے کہ انہیں آئندہ زلمی ویمن لیگ میں شامل کیا جائے گا۔
جاوید آفریدی نے مزید کہا کہ آئنہ کی کرکٹ ترقی کے لیے انہیں پیشہ ورانہ کوچنگ، مکمل کرکٹ سازوسامان اور معیاری تربیتی سہولیات فراہم کی جائیں گی تاکہ کم عمری میں ہی ان کی صلاحیتوں کو نکھارا جا سکے۔
خیال کیا جا رہا ہے کہ آئنہ وزیر کی یہ کامیابی قبائلی اضلاع میں خواتین کھیلوں کے فروغ کے لیے ایک مثبت مثال ثابت ہوگی اور دیگر بچیوں کو بھی اپنے خواب پورے کرنے کا حوصلہ ملے گا۔
