روس میں تعینات ایرانی سفیر کاظم جلالی نے کہا ہے کہ ایران اور روس کے درمیان گزشتہ چند برسوں میں طے پانے والے فوجی و دفاعی معاہدوں پر باقاعدہ عملدرآمد جاری ہے اور حالیہ سرگرمیاں انہی طے شدہ معاہدوں کا حصہ ہیں۔
اپنے بیان میں سفیر نے واضح کیا کہ روسی کارگو طیاروں، خصوصاً Ilyushin Il-76TD، کی ایران آمد کوئی نیا یا خفیہ اقدام نہیں بلکہ ماضی میں طے شدہ دفاعی معاہدوں کے تحت معمول کی پیش رفت ہے۔ ان کا کہنا تھا کہ ان پروازوں کو غیر معمولی یا سنسنی خیز رنگ دینا درست نہیں۔
کاظم جلالی نے مزید کہا کہ ایران کو درپیش سکیورٹی خطرات سے نمٹنے کے لیے وہ بنیادی طور پر اپنی داخلی صلاحیتوں پر انحصار کرتا ہے، تاہم روس کے ساتھ دفاعی تعاون جاری، شفاف اور باہمی مفاد پر مبنی ہے۔ ان کے مطابق دونوں ممالک کے درمیان تعاون علاقائی استحکام کے تناظر میں ضروری سمجھا جاتا ہے۔
سفارتی حلقوں کے مطابق ایرانی سفیر کا یہ بیان ایسے وقت سامنے آیا ہے جب خطے میں بڑھتی کشیدگی کے باعث روس اور ایران کے دفاعی تعلقات عالمی توجہ کا مرکز بنے ہوئے ہیں۔
