وفاقی دارالحکومت اور جڑواں شہر میں منشیات فروشی کے خلاف بڑی پیش رفت سامنے آئی ہے، جہاں اینٹی نارکوٹکس فورس نے خفیہ اطلاعات پر کارروائی کرتے ہوئے ایک غیر ملکی منشیات نیٹ ورک کے سرغنہ سمیت دو کارندوں کو گرفتار کر لیا۔
اے این ایف حکام کے مطابق کارروائی کے دوران ایک نائجیرین گروہ کو بے نقاب کیا گیا جو مبینہ طور پر اسلام آباد اور راولپنڈی میں طلبہ کو کوکین اور آئس (میتھ ایمفیٹامین) فراہم کر رہا تھا۔
گرفتار ملزمان کے قبضے سے مجموعی طور پر 860 گرام کوکین کیپسولز، کوکین پیکٹس اور میتھ ایمفیٹامین برآمد کی گئی۔
حکام کا کہنا ہے کہ گروہ کا سرغنہ بھی حراست میں ہے جبکہ منشیات کی ترسیل کے لیے استعمال ہونے والی گاڑی کو تحویل میں لے لیا گیا ہے۔ ملزمان کے خلاف انسدادِ منشیات ایکٹ کے تحت مقدمہ درج کر کے مزید تفتیش شروع کر دی گئی ہے۔
اے این ایف کے مطابق اسلام آباد میں موجود اس نیٹ ورک کے دیگر ممکنہ ارکان کی گرفتاری کے لیے بھی تحقیقات کا دائرہ وسیع کیا جا رہا ہے، جبکہ تعلیمی اداروں کے اطراف نگرانی مزید سخت کر دی گئی ہے۔
ادھر حکام نے واضح کیا ہے کہ نوجوانوں کو منشیات کی لعنت سے محفوظ رکھنے کے لیے ڈرگ فری اسلام آباد مہم پر بھرپور عملدرآمد جاری ہے اور شہر میں منشیات فروشوں کے خلاف زیرو ٹالرنس پالیسی اختیار کی گئی ہے۔
