چینی نئے سال کی آمد پر پاکستان میں جاری سی پیک منصوبوں سے وابستہ چینی ملازمین کے اعزاز میں خصوصی اور رنگا رنگ تقریبات کا انعقاد کیا گیا، جن میں پاکستانی حکام نے شرکت کر کے دوطرفہ دوستی اور خیرسگالی کا پیغام دیا۔
پاک چین اقتصادی راہداری کے مختلف منصوبوں پر تعینات چینی شہریوں کے لیے خصوصی عشائیوں، ثقافتی پروگرامز اور اسپورٹس گالا کا اہتمام کیا گیا۔ تقریبات میں روایتی چینی موسیقی، ثقافتی پرفارمنسز اور دوستانہ کھیلوں کے مقابلوں نے ماحول کو خوشگوار بنا دیا۔
حکام کے مطابق متعدد چینی باشندے اس اہم تہوار کے موقع پر اپنے اہلِ خانہ کے ساتھ چین میں شریک نہ ہو سکے، لہٰذا ان کے لیے پاکستان میں ہی جشن کا بھرپور انتظام کیا گیا تاکہ وہ خود کو گھر سے دور تنہا محسوس نہ کریں۔
تقریبات میں شریک پاکستانی سینئر حکام نے چینی شہریوں کے ساتھ یکجہتی کا اظہار کرتے ہوئے کہا کہ پاکستان اور چین کی دوستی وقت کی ہر آزمائش پر پوری اتری ہے۔ انہوں نے اس موقع پر دونوں ممالک کے درمیان تعاون کو مزید فروغ دینے کے عزم کا اعادہ بھی کیا۔
ماہرین کے مطابق پاکستان میں چینی سالِ نو کی تقریبات کا انعقاد نہ صرف سی پیک سے وابستہ چینی عملے کے ساتھ یکجہتی کا مظہر ہے بلکہ یہ دونوں ممالک کے مابین بڑھتے ہوئے باہمی اعتماد اور قریبی تعلقات کی علامت بھی ہے۔
تجزیہ کاروں کا کہنا ہے کہ سی پیک پاکستان اور China کے درمیان معاشی تعاون کا ایک اہم ترین منصوبہ ہے جو توانائی، انفراسٹرکچر اور صنعتی ترقی میں کلیدی کردار ادا کر رہا ہے، اور ایسی تقریبات دونوں ممالک کی دوستی کو مزید مستحکم کرنے میں مددگار ثابت ہوں گی۔
