لاہور کی احتساب عدالت نے قومی احتساب بیورو (نیب) کی درخواست منظور کرتے ہوئے سابق وزیراعظم نواز شریف اور وزیراعلیٰ پنجاب مریم نواز کے خلاف چوہدری شوگر ملز کیس کی تحقیقات بند کرنے کی حتمی منظوری دے دی۔
عدالت کے جج رانا عارف نے محفوظ فیصلہ سناتے ہوئے کہا کہ نیب نے اپنی درخواست میں موقف اختیار کیا تھا کہ مریم نواز اور نواز شریف کے خلاف کرپشن کے کوئی ٹھوس شواہد نہیں ملے، جس کے بعد ایگزیکٹو بورڈ نے تحقیقات بند کرنے کی منظوری دی تھی۔
لاہور ہائیکورٹ نے بھی نیب کو یہ ہدایت دی تھی کہ تحقیقات بند کرنے کے لیے حتمی منظوری کے لیے احتساب عدالت سے رجوع کرے۔
اس کے بعد عدالت نے کیس بند کرنے کی حتمی منظوری دے دی اور اس معاملے میں مزید کارروائی کے امکان کو ختم کر دیا۔
اس فیصلے کے بعد نواز شریف اور مریم نواز کے خلاف چوہدری شوگر ملز کیس میں قانونی کارروائی ختم ہو گئی اور انہیں اس کیس میں مکمل ریلیف مل گیا۔
