نائب وزیر اعظم و وزیر خارجہ اسحاق ڈار نے کہا ہے کہ موجودہ علاقائی صورتحال کے تناظر میں مسلم امہ کا اتحاد پہلے سے کہیں زیادہ اہمیت اختیار کر گیا ہے۔ انہوں نے زور دیا کہ اقوام متحدہ کے چارٹر کے مطابق تمام ممالک کی خودمختاری اور سلامتی کا احترام ناگزیر ہے۔
اسلام آباد میں چار ملکی وزرائے خارجہ کے اجلاس کے بعد نیوز بریفنگ دیتے ہوئے اسحاق ڈار کا کہنا تھا کہ اجلاس میں خطے کی مجموعی صورتحال پر تفصیلی غور کیا گیا۔
انہوں نے بتایا کہ تمام وزرائے خارجہ نے اس بات پر اتفاق کیا کہ جنگ کسی بھی فریق کے مفاد میں نہیں اور خطے میں کشیدگی کے جلد خاتمے کے لیے فوری اقدامات ضروری ہیں۔
انہوں نے مزید کہا کہ اجلاس میں اس امر پر بھی زور دیا گیا کہ مسائل کا حل صرف بات چیت اور مؤثر سفارت کاری کے ذریعے ہی ممکن ہے، جبکہ امن و استحکام کے قیام کے لیے مشترکہ کوششیں جاری رکھنے پر اتفاق کیا گیا۔
اسحاق ڈار کے مطابق اجلاس میں پاکستان، سعودی عرب، ترکیے اور مصر کے درمیان باہمی تعاون کو مزید فروغ دینے پر بھی تبادلہ خیال ہوا۔ انہوں نے اس بات پر اطمینان کا اظہار کیا کہ ایران اور امریکا دونوں نے پاکستان پر اعتماد کا اظہار کیا ہے۔
وزیر خارجہ نے مزید بتایا کہ چین کے وزیر خارجہ کے ساتھ بھی ٹیلیفون پر تفصیلی گفتگو ہوئی، جس میں خطے کی صورتحال اور امن کے قیام سے متعلق امور زیر بحث آئے۔
