واشنگٹن: امریکی صدر ڈونلڈ ٹرمپ نے کہا ہے کہ ایران کے ساتھ ممکنہ معاہدہ جلد طے پا سکتا ہے اور اس حوالے سے پاکستانی سفارتکاروں کے ذریعے بالواسطہ مذاکرات میں پیش رفت ہو رہی ہے۔
برطانوی اخبار فنانشل ٹائمز کو دیے گئے انٹرویو میں ڈونلڈ ٹرمپ کا کہنا تھا کہ امریکا ایران کے تیل پر کنٹرول حاصل کرنے کی صلاحیت رکھتا ہے اور ضرورت پڑنے پر خارگ جزیرے پر بھی قبضہ کر سکتا ہے۔
انہوں نے دعویٰ کیا کہ ایران نے کئی پاکستانی پرچم بردار جہازوں کو آبنائے ہرمز سے گزرنے کی اجازت دی ہے، جس کے بعد اس اہم گزرگاہ سے گزرنے والے جہازوں کی تعداد 20 تک پہنچ گئی ہے۔
امریکی صدر کے مطابق ایرانی پارلیمنٹ کے اسپیکر باقر قالیباف کی جانب سے جہازوں کو گزرنے کی اجازت دی گئی، جو خطے میں جاری کشیدگی کے باوجود ایک اہم پیش رفت سمجھی جا رہی ہے۔
