یروشلم: اسرائیلی صدر آئزک ہرزوگ نے کرپشن الزامات کے تناظر میں وزیراعظم بنیامین نیتن یاہو کی معافی سے متعلق درخواست مزید غور کے لیے وزارت انصاف کو واپس بھجوا دی ہے۔
میڈیا رپورٹس کے مطابق صدر ہرزوگ نے حتمی فیصلہ کرنے سے قبل مزید قانونی مواد طلب کرلیا ہے۔ اس حوالے سے صدر کے قانونی مشیر کا کہنا ہے کہ جاری عدالتی کارروائی کے دوران معافی دینے کے اختیارات سے متعلق سابقہ مثالوں اور اضافی قانونی نکات کا جائزہ لینا ضروری ہے، خصوصاً ایسے معاملات میں جہاں سفارتی یا سکیورٹی پہلو بھی شامل ہوں۔
حکام کے مطابق درخواست کی واپسی کا مقصد صرف پیشہ ورانہ اور قانونی جائزے کے عمل کو مکمل کرنا ہے، اور اس اقدام کو کسی حتمی فیصلے کا عندیہ نہیں سمجھا جانا چاہیے۔
