سکیورٹی فورسز نے خیبر پختونخوا کے مختلف علاقوں میں کامیاب کارروائیاں کرتے ہوئے 13 خوارج کو ہلاک کر دیا۔ پاک فوج کے شعبہ تعلقات عامہ (آئی ایس پی آر) کے مطابق یہ آپریشنز باڑہ اور بنوں میں انجام دیے گئے۔
آئی ایس پی آر کا کہنا ہے کہ باڑہ میں انٹیلی جنس بیسڈ آپریشن کے دوران 10 خوارج مارے گئے، جبکہ ضلع بنوں میں کارروائی کے دوران مزید 3 خوارج کو ہلاک کیا گیا۔ ترجمان کے مطابق علاقے میں دہشتگردوں کے مکمل خاتمے کے لیے کلیئرنس آپریشنز تاحال جاری ہیں۔
وزیراعظم شہباز شریف نے ان کامیاب کارروائیوں پر سکیورٹی فورسز کو خراج تحسین پیش کرتے ہوئے کہا کہ فورسز نے پیشہ ورانہ مہارت کا مظاہرہ کرتے ہوئے بنوں اور باڑہ میں دہشتگردوں کا خاتمہ کیا۔ انہوں نے مزید کہا کہ سکیورٹی فورسز ملک سے دہشتگردی کے ناسور کے خاتمے کے لیے سیسہ پلائی دیوار کی طرح ڈٹی ہوئی ہیں۔
