تل ابیب: اسرائیلی وزیر اعظم بنجمن نیتن یاہو نے ایک بار پھر جنگ بندی کو سبوتاژ کرنے کے اشارے دیتے ہوئے کہا ہے کہ اسرائیل ایران کے خلاف دوبارہ جنگ کے لیے تیار ہے۔
اپنے بیان میں انہوں نے کہا کہ اسرائیل کے مزید اہداف ہیں جنہیں یا تو معاہدے کے ذریعے یا جنگ دوبارہ شروع کرکے حاصل کیا جائے گا، جبکہ ایران کے ساتھ جنگ بندی میں حزب اللہ شامل نہیں ہے۔
نیتن یاہو نے مزید کہا کہ اسرائیل ایران کے خلاف جنگ دوبارہ شروع کرنے کے لیے مکمل طور پر تیار ہے اور “ہماری انگلیاں ٹریگر پر ہیں۔” انہوں نے زور دیا کہ چاہے سفارتی معاہدہ ہو یا طاقت کا استعمال، ایران کے افزودہ یورینیم پروگرام کو ختم کیا جائے گا۔
اسرائیلی وزیر اعظم کے مطابق جنگ بندی کا معاہدہ اسرائیل کے مکمل تعاون سے طے پایا، تاہم یہ کسی صورت جنگ کا اختتام نہیں بلکہ ایک عارضی مرحلہ ہے۔
