لاہور میں پاکستان کے سینئر سیاستدان اور سابق گورنر پنجاب سردار ذوالفقار کھوسہ انتقال کر گئے۔ وہ طویل عرصے سے علیل تھے اور نجی اسپتال میں زیر علاج تھے جہاں انہوں نے 90 برس کی عمر میں آخری سانس لیا۔
اہل خانہ کے مطابق سردار ذوالفقار کھوسہ کچھ عرصے سے شدید علالت کا شکار تھے اور ان کا علاج جاری تھا، تاہم وہ جانبر نہ ہو سکے۔ ان کے انتقال پر سیاسی و سماجی حلقوں میں گہرے دکھ اور افسوس کا اظہار کیا جا رہا ہے۔
سردار ذوالفقار کھوسہ نے اپنے سیاسی کیریئر کا آغاز 1962 میں کیا جب وہ پہلی مرتبہ رکن پنجاب اسمبلی منتخب ہوئے۔ اس کے بعد وہ مسلسل کئی دہائیوں تک ملکی سیاست میں سرگرم رہے اور مختلف اہم عہدوں پر خدمات انجام دیں۔ وہ متعدد بار صوبائی وزیر، مشیر اور سینیٹر رہے جبکہ گورنر پنجاب کے منصب پر بھی فائز رہے۔
اپنی سیاسی زندگی کے بیشتر عرصے میں وہ مسلم لیگ ن سے وابستہ رہے اور نواز شریف کی جلاوطنی کے دور میں پنجاب میں پارٹی کے صدر کے طور پر بھی ذمہ داریاں ادا کیں۔ بعد ازاں 2018 کے عام انتخابات سے قبل انہوں نے پاکستان تحریک انصاف میں شمولیت اختیار کر لی تھی۔
ان کے انتقال سے ملکی سیاست کا ایک اہم باب ختم ہو گیا ہے، جبکہ ان کی خدمات کو طویل عرصے تک یاد رکھا جائے گا۔
