اسرائیلی وزیراعظم نیتن یاہو نے اپنی کابینہ کو ہدایت دی ہے کہ لبنان کے ساتھ براہِ راست مذاکرات جلد از جلد شروع کیے جائیں تاکہ خطے میں جاری کشیدگی کے باوجود تعلقات میں بہتری لائی جا سکے۔
غیر ملکی خبر رساں ایجنسی کے مطابق نیتن یاہو نے کہا کہ لبنان کی جانب سے اسرائیل کے ساتھ براہِ راست مذاکرات کی متعدد درخواستوں کے پیشِ نظر یہ قدم اٹھایا گیا ہے۔
ان کے بیان میں واضح کیا گیا کہ یہ مذاکرات خاص طور پر حزب اللہ کو غیر مسلح کرنے اور اسرائیل اور لبنان کے درمیان پُرامن تعلقات قائم کرنے پر مرکوز ہوں گے۔
وزیراعظم نے کہا کہ اسرائیل خطے میں امن و استحکام کے لیے سنجیدہ ہے اور سفارتی روابط کو مضبوط بنانے کی کوششیں جاری رکھے گا۔
یہ بیان ایسے وقت میں سامنے آیا ہے جب مشرق وسطیٰ میں کشیدگی کے باوجود دونوں ملکوں کے درمیان سفارتی رابطوں کی رفتار میں اضافہ دیکھا جا رہا ہے، اور امید کی جا رہی ہے کہ براہِ راست مذاکرات خطے میں دیرپا امن کے قیام میں مددگار ثابت ہوں گے۔
