سعودی عرب کی وزارت دفاع نے اعلان کیا ہے کہ پاکستان کا ایک فوجی دستہ دو طرفہ اسٹریٹیجک دفاعی معاہدے کے تحت کنگ عبدالعزیز ائیر بیس پہنچ گیا ہے۔
سعودی وزارت دفاع کی جانب سے سوشل میڈیا پلیٹ فارم X پر جاری بیان کے مطابق یہ اقدام دونوں برادر ممالک کے درمیان طے پانے والے مشترکہ دفاعی تعاون کے معاہدے کا حصہ ہے، جس کے تحت اسلامی جمہوریہ پاکستان کا فضائی دستہ مشرقی علاقے میں تعینات کیا گیا ہے۔
بیان میں مزید بتایا گیا ہے کہ پاکستانی دستہ پاک فضائیہ کے لڑاکا اور معاون طیاروں پر مشتمل ہے، جس کا مقصد دونوں ممالک کی مسلح افواج کے درمیان دفاعی تعاون کو فروغ دینا اور پیشہ ورانہ صلاحیتوں کو مزید بہتر بنانا ہے۔
سعودی حکام کے مطابق اس تعیناتی سے نہ صرف دونوں ممالک کی افواج کے درمیان ہم آہنگی میں اضافہ ہوگا بلکہ آپریشنل تیاری کی سطح بھی بلند ہوگی، جبکہ یہ اقدام خطے اور عالمی سطح پر امن و استحکام کے فروغ میں بھی معاون ثابت ہوگا۔
