انٹرنیشنل کرکٹ کونسل (آئی سی سی) نے فیصلہ کیا ہے کہ اگر بنگلادیش کرکٹ ٹیم ٹی20 ورلڈ کپ کے لیے بھارت نہیں جا سکتی تو اس کی جگہ متبادل ٹیم کو شامل کیا جائے گا۔
کرکٹ ویب سائٹس کے مطابق آئی سی سی نے یہ فیصلہ بورڈ ممبرز میٹنگ میں کیا، جس میں بھارت میں کھیلنے کے حوالے سے بنگلادیش کے معاملے پر بحث ہوئی۔ اجلاس میں ووٹنگ کے ذریعے فیصلہ کیا گیا کہ اگر بنگلادیش ٹیم نہیں بھیجی گئی تو نئی ٹیم شامل کی جائے۔
آئی سی سی نے بنگلادیش کرکٹ بورڈ (BCB) کو بھارت جانے سے متعلق فیصلہ کرنے کے لیے ایک روز کا مزید وقت دے دیا ہے تاکہ حکومت اور بورڈ اپنی پوزیشن طے کر سکیں۔
ذرائع کے مطابق اجلاس میں اکثریتی ارکان نے متبادل ٹیم کو شامل کرنے کے حق میں ووٹ دیا، اور یہ اقدام ٹی20 ورلڈ کپ کے شیڈول اور مقابلوں کے تسلسل کو یقینی بنانے کے لیے کیا گیا ہے۔
