ایران نے جرمنی کی حالیہ خارجہ پالیسی اور قیادت پر شدید تنقید کرتے ہوئے کہا ہے کہ جو ملک کبھی یورپ کی ترقی اور استحکام کا محرک سمجھا جاتا تھا، آج وہ تنزلی اور سیاسی کمزوری کی علامت بنتا جا رہا ہے۔
ایرانی وزیر خارجہ سید عباس عراقچی کے مطابق گزشتہ برس ستمبر میں نیویارک میں جرمن رہنما فریڈرک مرز (Merz) کے اصرار پر یورپی ممالک کے گروپ (E3) نے ایران کے ساتھ جاری جوہری مذاکرات میں اپنا تعمیری کردار ختم کرتے ہوئے اقوام متحدہ کی پابندیاں دوبارہ عائد کرانے کی کوشش کی۔ تاہم اب یہی جرمن قیادت دوبارہ انہی مذاکرات میں شامل ہونے کی خواہش مند دکھائی دے رہی ہے۔
ایران نے مرز کی پالیسیوں کو "سیاسی ناپختگی” اور "غیر ذمہ دارانہ رویہ” قرار دیتے ہوئے کہا کہ ایرانی قوم کو ان کی جانب سے کئی نامناسب اور اشتعال انگیز بیانات کا سامنا کرنا پڑا ہے۔
بیان میں کہا گیا کہ جون 2025 میں اسرائیلی حملوں میں ایک ہزار سے زائد ایرانی شہریوں کی ہلاکت کے موقع پر مرز کے ردعمل کو تہران نے انتہائی افسوسناک اور غیر انسانی قرار دیا۔ مزید برآں، انہوں نے ایران کے جلد زوال سے متعلق عوامی بیانات دے کر سفارتی آداب کی خلاف ورزی کی۔
ایران نے واضح کیا کہ جرمن عوام ہمیشہ محنت، ذہانت اور انسانیت کی خدمت کے حوالے سے قابلِ احترام رہے ہیں اور تہران نے ہمیشہ برلن کے ساتھ مضبوط اور مثبت تعلقات کو ترجیح دی ہے۔ تاہم موجودہ قیادت کے طرزِ عمل نے دوطرفہ تعلقات کو نقصان پہنچایا ہے۔
ایرانی حکام نے امید ظاہر کی کہ مستقبل میں جرمنی میں زیادہ بالغ، ذمہ دار اور باوقار سیاسی قیادت ابھرے گی جو عالمی سطح پر تعمیری کردار ادا کرے گی۔
