آل پاکستان کائٹ فلائنگ ایسوسی ایشن کے پیٹرن چیف عقیل ملک نے دعویٰ کیا ہے کہ بسنت کے موقع پر صوبہ پنجاب میں تقریباً 20 ارب روپے سے زائد کا کاروبار ہوا۔
لاہور میں پریس کانفرنس کے دوران عقیل ملک نے کہا کہ لاہور میں بسنت کے دوران ہر عمر کے لوگ چھتوں پر نکل کر جشن مناتے نظر آئے، 10 سے 70 سال کے افراد بھی اس فیسٹیول میں شریک تھے۔ انہوں نے لاہور میں بسنت کے دوبارہ بحالی میں مریم نواز کے کردار کو بھی سراہا۔
عقیل ملک نے بتایا کہ بانس اور پیپر بیچنے والوں نے غیر ضروری ریٹس بڑھائے اور پتنگ بنانے والوں نے بھی قیمتیں بڑھا کر صارفین کے لیے مشکلات پیدا کیں۔
ان کے مطابق تین ہزار والی پتنگ 35 ہزار روپے میں فروخت ہوئی اور ناجائز منافع خوری عام رہی۔ انہوں نے اعلان کیا کہ آئندہ بسنت پر پتنگوں اور ڈور کے ریٹس مختص کیے جائیں گے تاکہ منصفانہ نظام قائم ہو۔
پیٹرن چیف نے مزید کہا کہ حکومت کا منصوبہ ہے کہ آئندہ سال سے پورے پنجاب میں بسنت کے جشن کو مکمل طور پر منایا جائے گا، جس سے اس تہوار کی رونق میں اضافہ ہوگا۔
