مسقط: ایران کی سپریم نیشنل سیکیورٹی کونسل کے سیکرٹری علی لاریجانی نے عمان کے دارالحکومت مسقط میں سلطان ہیثم بن طارق سے ملاقات کی، جس میں ایران اور امریکا کے درمیان جاری مذاکرات سمیت اہم علاقائی و بین الاقوامی امور پر تبادلہ خیال کیا گیا۔
مہر خبررساں ایجنسی کے مطابق منگل کے روز ہونے والی اس ملاقات میں دونوں رہنماؤں نے ایران۔امریکہ مذاکرات کی حالیہ پیش رفت کا جائزہ لیا اور ایسے متوازن اور منصفانہ معاہدے تک پہنچنے کے امکانات پر گفتگو کی جو فریقین کے مفادات کا تحفظ کر سکے۔
عمانی میڈیا رپورٹس کے مطابق بات چیت میں اس امر پر زور دیا گیا کہ اختلافات کے حل اور کشیدگی میں کمی کے لیے مکالمے کا تسلسل ناگزیر ہے، تاکہ پرامن ذرائع سے علاقائی اور عالمی امن و استحکام کو فروغ دیا جا سکے۔
یہ ملاقات عمان اور ایران کے درمیان جاری سفارتی مشاورت کا حصہ تھی، جس سے ظاہر ہوتا ہے کہ عمان خطے میں مذاکرات اور سفارتی حل کی حمایت میں اپنا فعال کردار برقرار رکھے ہوئے ہے۔
علی لاریجانی ایک اعلیٰ سطحی وفد کے ہمراہ سرکاری دورے پر مسقط پہنچے تھے۔ دورے کے دوران خطے کی موجودہ صورتحال، عالمی پیش رفت اور دونوں ممالک کے درمیان دوطرفہ تعاون کے فروغ پر بھی بات چیت شامل تھی۔
یہ دورہ ایران اور امریکا کے درمیان جوہری پابندیوں سے متعلق امور پر مسقط میں ہونے والے بالواسطہ مذاکرات کے پہلے مرحلے کے بعد سامنے آیا ہے، ایسے وقت میں جب خطے میں فوجی سرگرمیوں میں اضافہ دیکھا جا رہا ہے۔
سلطانِ عمان سے ملاقات کے بعد علی لاریجانی نے عمان کے وزیر خارجہ بدر بن حمد البوسعیدی سے بھی علیحدہ ملاقات کی، جس میں باہمی دلچسپی کے امور پر مزید تبادلہ خیال کیا گیا۔
