ملک میں پیٹرولیم مصنوعات کی فراہمی میں بہتری کی امید ہے کیونکہ آج ایک اور آئل ٹینکر 55 ہزار میٹرک ٹن موٹر پیٹرول لے کر پورٹ قاسم پہنچنے والا ہے، جو ملکی ضروریات کو پورا کرنے میں اہم کردار ادا کرے گا۔
پورٹ حکام کے مطابق آئل ٹینکر "ایم ٹی خیرپور” عمان کے شہر صحار سے درآمد شدہ 55 ہزار میٹرک ٹن پیٹرول لے کر پاکستان اسٹیٹ آئل (پی ایس او) کے لیے پورٹ قاسم پہنچے گا۔ جہاز کی آمد پر اسے فوٹکو ٹرمینل پر لنگر انداز کیا جائے گا، جہاں سے پیٹرول کی ترسیل کا عمل فوری طور پر شروع ہوگا۔
ڈیلی شپنگ رپورٹ کے مطابق ایک اور جہاز "ایم ٹی دیرا غیرا” اس وقت فوٹکو ٹرمینل پر موجود ہے، جس نے گزشتہ 24 گھنٹوں کے دوران 32 ہزار میٹرک ٹن موٹر گیسولین آف لوڈ کر دی ہے، جبکہ اس کی مجموعی مقدار 34 ہزار 62 میٹرک ٹن ہے۔ رپورٹ کے مطابق یہ جہاز ہفتے کو دوپہر 3 بج کر 30 منٹ پر روانہ ہوگا، جس کے بعد نئے آئل ٹینکر کے لیے جگہ خالی ہو جائے گی۔
پورٹ قاسم کی روزانہ رپورٹ کے مطابق اس وقت بندرگاہ پر 11 جہاز موجود ہیں، جہاں کوئلہ، پیلی مٹر، سیمنٹ، ایل پی جی، فاسفورک ایسڈ اور بٹومین سمیت مختلف اشیاء کی ہینڈلنگ جاری ہے۔
