اسلام آباد: وزیر خزانہ سینیٹر محمد اورنگزیب نے انٹرنیشنل فنانس کارپوریشن کے مینیجنگ ڈائریکٹر مختار ڈیوپ سے ملاقات کی، جس میں دو طرفہ مالی تعاون، سرمایہ کاری اور جاری منصوبوں پر تبادلہ خیال کیا گیا۔
وزیر خزانہ نے آئی ایف سی کی حالیہ تنظیمِ نو میں پاکستان کو علاقائی مرکز کا درجہ دینے پر شکریہ ادا کیا اور اس فیصلے کو پاکستان کی معیشت پر عالمی برادری کے اعتماد کا مظہر قرار دیا۔
ملاقات میں سینیٹر محمد اورنگزیب نے ریکو ڈِک منصوبے میں ہونے والی پیش رفت سے مختار ڈیوپ کو آگاہ کیا اور امید ظاہر کی کہ ایگزِم بینک جلد اس اہم منصوبے میں شمولیت اختیار کرے گا۔
وزیر خزانہ نے ذیلی سطح پر مالیاتی تعاون، ڈیجیٹل پیمنٹ رائٹس، اور دیگر منصوبوں میں آئی ایف سی کی معاونت کو سراہا۔ انہوں نے دوا سازی، الیکٹرک گاڑیوں اور کموڈیٹی ایکسچینجز کے شعبوں میں آئی ایف سی کے مشاورتی کردار کی بھی تعریف کی۔
اس موقع پر، دونوں رہنماؤں نے اسٹیٹ بینک آف پاکستان اور آئی ایف سی کے درمیان سواپ ایگریمنٹ پر دستخط کی تقریب میں بھی شرکت کی۔
وزیر خزانہ نے مختار ڈیوپ کے آئندہ بہار اجلاس کے موقع پر پاکستان کے متوقع دورے کا خیرمقدم کیا اور امید ظاہر کی کہ یہ دورہ دو طرفہ معاشی تعلقات کو مزید مضبوط بنائے گا۔
