تحریر::حسینہ کاظمی::سردیوں کی آمد کے ساتھ ہی پاکستان کے تعلیمی اداروں میں چھٹیوں کا اعلان بچوں کے چہروں پر خوشی بکھیر دیتا ہے۔ سال بھر کی تعلیمی مصروفیات، امتحانات، ہوم ورک اور ذہنی دباؤ کے بعد یہ وقفہ بچوں کے لیے تازہ ہوا کا جھونکا ہوتا ہے۔
ان چھٹیوں سے نہ صرف تھکن اترتی ہے بلکہ بچے نئی توانائی اور جوش و خروش کے ساتھ اگلے تعلیمی سال یا سیشن کے لیے خود کو تیار کر پاتے ہیں۔ تاہم وقت کا بہترین استعمال اسی وقت ممکن ہے جب بچے اور والدین مل کر چھٹیوں کو بامقصد انداز میں منصوبہ بندی کے ساتھ گزاریں۔
سردیوں کے موسم میں پاکستان کے مختلف علاقے اپنی تمام تر خوبصورتی کے ساتھ کھل اٹھتے ہیں اور بچوں کے لیے تفریح، قدرتی مشاہدہ اور سیکھنے کے مواقع فراہم کرتے ہیں۔
پاکستان کے شمالی علاقے ہر سال سردیوں کی برف باری کے باعث دنیا بھر کی توجہ کا مرکز بنتے ہیں۔ مری ان میں سب سے زیادہ مشہور مقام ہے جہاں اسلام آباد اور راولپنڈی سے چند گھنٹوں میں پہنچا جا سکتا ہے۔ مری کی مال روڈ، پتریاٹہ کی چیئر لفٹس اور برف سے ڈھکی سڑکیں بچوں کے لیے غیر معمولی کشش رکھتی ہیں۔
سوات اور مالم جبہ کے حسین پہاڑی مناظر اور اسکیئنگ کے مواقع بچوں کو نہ صرف تفریح دیتے ہیں بلکہ ان میں حوصلہ، اعتماد اور فطرت سے محبت کا جذبہ بھی پیدا کرتے ہیں۔ ناران اور کاغان کی وادیاں سخت سردی کے باوجود اپنی سفید چادر اوڑھے سیاحوں کو متاثر کرتی ہیں۔ ایسے مقامات کی سیر بچوں کی یادوں میں ہمیشہ تازہ رہتی ہے۔
بلوچستان کے علاقے بھی سردیوں میں الگ انداز سے رونق اختیار کرتے ہیں۔ کوئٹہ کی برفیلی ہوا اور زیارت کے خوبصورت دیودار کے جنگلات بچوں کو فطرت سے جوڑتے ہیں۔ زیارت میں قائد اعظم کی رہائش گاہ کا تاریخی دورہ بچوں کو تاریخ اور قومی ورثے سے روشناس کراتا ہے۔
گلگت، ہنزہ اور اسکردو ایسے علاقے ہیں جو اپنی قدرتی خوبصورتی، بلند و بالا پہاڑوں اور بہتے دریاؤں کے باعث دنیا بھر میں معروف ہیں۔ اگرچہ وہاں تک رسائی نسبتاً مشکل ہوتی ہے لیکن جو خاندان طویل سفر کر سکتے ہیں ان کے لیے یہ چھٹیاں ناقابل فراموش تجربہ ثابت ہوتی ہیں۔
یہ بات ضروری نہیں کہ تفریح کے لیے صرف شمالی علاقہ جات ہی کا انتخاب کیا جائے۔ اگر والدین بچوں کو دور دراز مقامات تک نہیں لے جا سکتے تو شہر کے اندر موجود تاریخی عمارتیں، عجائب گھر، پارک، چڑیا گھر اور ساحل سمندر بھی چھٹیوں کے لیے بہترین تفریحی مقامات ہو سکتے ہیں۔
مثلاً کراچی میں سی ویو کا ساحل، لاہور کا شالامار باغ اور بادشاہی مسجد یا فیصل مسجد اسلام آباد کی زیارت بچوں کے ذہن پر گہرے اثرات چھوڑتی ہے۔ ان مقامات کا دورہ بچوں میں تاریخ، ثقافت اور وطن سے محبت کا جذبہ پیدا کرتا ہے۔
سردیوں کی چھٹیوں کا بہترین فائدہ اٹھانے کے لیے ضروری ہے کہ بچے اپنا وقت منظم انداز میں گزاریں۔ صبح دیر تک سونے کے بجائے سحر خیزی کی عادت ڈالیں۔ جلد اٹھنے سے جسم میں تازگی آتی ہے اور دن بھر کے کام اچھے انداز میں انجام دیے جا سکتے ہیں۔
سفر کے دوران بھی نظم و ضبط بہت اہم ہے۔ والدین بچوں کو یہ سکھائیں کہ جس ماحول میں جائیں اسے صاف رکھیں۔ راستے میں کوڑا کرکٹ نہ پھینکیں، درختوں کو نقصان نہ پہنچائیں اور مقامی لوگوں کا احترام کریں۔
چھٹیاں صرف تفریح کے لیے نہیں ہوتیں بلکہ یہ وقت سیکھنے کے مواقع بھی فراہم کرتا ہے۔ بچوں کو چاہیے کہ مطالعہ جاری رکھیں، کہانیاں پڑھیں، نئی معلومات حاصل کریں اور اپنی دلچسپی کے مطابق کوئی ہنر سیکھنے کی کوشش کریں۔
گھر میں والدین کی مدد سے چھوٹے چھوٹے تجربات اور سائنسی سرگرمیاں چھٹیوں کو دلچسپ بنا سکتی ہیں۔ اس کے علاوہ سردیوں میں جسمانی سرگرمیوں کا زیادہ اہتمام کرنا چاہیے تاکہ بچے سستی اور کمزوری سے بچ سکیں۔ ورزش، کھیل کود اور سیر نہ صرف صحت کے لیے فائدہ مند ہیں بلکہ ذہن کو بھی تروتازہ کرتے ہیں۔
گھر کے کاموں میں والدین کا ہاتھ بٹانا، جیسے بستر بچھانا، کتابیں ترتیب دینا یا چھوٹے کام میں مدد کرنا، بچوں میں ذمہ داری کا احساس پیدا کرتا ہے۔ چھٹیاں ایک بہترین موقع ہیں کہ بچوں کو معاشرتی آداب، صفائی ستھرائی اور دوسروں کے حقوق کا خیال رکھنے کی تربیت دی جائے۔
سفر سے متعلق ایک اہم بات یہ ہے کہ والدین سفر کی منصوبہ بندی بجٹ کے مطابق کریں۔ رہائش، ٹرانسپورٹ اور کھانے پینے کے اخراجات کا تخمینہ پہلے سے لگانا چاہیے تاکہ سفر کے دوران کسی دشواری کا سامنا نہ کرنا پڑے۔ یہ منصوبہ بندی بچوں کو مالی نظم و ضبط سکھاتی ہے اور مستقبل کے لیے عملی تربیت دیتی ہے۔
سردیوں کی چھٹیاں خاندان کے افراد کو ایک دوسرے کے قریب لانے کا بہترین ذریعہ بن سکتی ہیں۔ روزمرہ کی مصروف زندگی میں خاندان کے افراد کے پاس ایک دوسرے کے لیے وقت نہیں ہوتا۔ ایسے میں چھٹیوں میں مشترکہ سرگرمیاں خاندان کے درمیان محبت اور تعلق کو مضبوط کرتی ہیں۔ بچے جب والدین کے ساتھ وقت گزارتے ہیں تو ان کے اعتماد میں اضافہ ہوتا ہے۔
آخر میں یہ بات کہنا بے جا نہ ہو گی کہ سردیوں کی چھٹیاں بچوں کے لیے خاص انعام ہیں۔ یہ نہ صرف ذہنی آرام اور جسمانی سکون کا ذریعہ بنتی ہیں بلکہ فطرت سے ہم آہنگ ہونے اور نئے تجربات سے گزرنے کا موقع بھی فراہم کرتی ہیں۔ پاکستان کی حسین وادیاں، برف پوش پہاڑ، تاریخی مقامات اور رنگین ثقافت ان چھٹیوں کو مزید خوشگوار بنا سکتی ہیں۔
اگر بچے اور والدین مل کر مناسب منصوبہ بندی کریں اور وقت کو قیمتی سمجھتے ہوئے گزاریں تو یہ چھٹیاں نہ صرف یادگار بلکہ تعلیمی، اخلاقی اور سماجی اعتبار سے مفید ثابت ہو سکتی ہیں۔ یوں سردیوں کی چھٹیوں کا ہر لمحہ ایک نئی توانائی اور مثبت جذبے کے ساتھ بچوں کی شخصیت اور تعلیم و شعور میں اضافہ کا باعث بن سکتا ہے۔
