فیلڈ مارشل سید عاصم منیر، نشانِ امتیاز (ملٹری)، ہلالِ جرأت، چیف آف آرمی اسٹاف و چیف آف ڈیفنس فورسز نے راولپنڈی کے کرائسٹ چرچ میں منعقدہ کرسمس کی تقریبات میں شرکت کی اور مسیحی برادری کے ساتھ خوشیوں کے اس موقع کو منایا۔
آئی ایس پی آر کے مطابق فیلڈ مارشل نے مسیحی برادری کو کرسمس کی دلی مبارکباد دیتے ہوئے امن، ہم آہنگی اور خوشحالی کے لیے نیک تمناؤں کا اظہار کیا۔
آئی ایس پی آر کے مطابق فیلڈ مارشل سید عاصم منیر نے قائداعظم محمد علی جناحؒ کو خراجِ عقیدت پیش کرتے ہوئے بانیٔ پاکستان کے مساوات، آزادی اور مذہبی رواداری کے وژن کو اجاگر کیا اور اقلیتوں کے حقوق کے تحفظ کو پاکستان کے نظریے کی بنیاد قرار دیا۔
انہوں نے تقریب میں شریک افراد سے گفتگو کے دوران قومی ترقی اور سلامتی کے لیے پاکستانی مسیحیوں کی خدمات کو سراہا۔
فیلڈ مارشل سید عاصم منیر نے بین المذاہب ہم آہنگی، باہمی احترام اور قومی اتحاد کی اہمیت پر زور دیتے ہوئے کہا کہ پاکستان کی اصل طاقت مساوی مواقع کی فراہمی اور آئین میں درج مشترکہ اقدار میں مضمر ہے، جو قوم کو متحد رکھنے کا ذریعہ ہیں۔
