بالی وڈ سپر اسٹار سنیل شیٹی نے ماضی میں 40 کروڑ روپے کی تشہیری پیشکش مسترد کرنے کا انکشاف کیا ہے اور اس کی وجہ بھی بتائی ہے۔
64 سالہ سنیل شیٹی نے حالیہ انٹرویو میں بتایا کہ انہیں ایک تمباکو برانڈ کی جانب سے اتنی بڑی رقم کی پیشکش کی گئی تھی، لیکن انہوں نے یہ پیشکش قبول نہیں کی کیونکہ وہ نوجوانوں کے لیے ایک مثال ہیں اور وہ ایسی کسی چیز سے وابستہ نہیں ہونا چاہتے تھے جس پر خود ان کا یقین نہ ہو۔
سنیل شیٹی نے کہا کہ وہ آج کل فلموں اور باکس آفس پر پہلے کی طرح فعال نہیں ہیں، لیکن پھر بھی 17، 18 سال کے نوجوان انہیں اپنا آئیڈیل سمجھتے ہیں، اور اسی وجہ سے انہوں نے کبھی بھی پیسے کے لیے اپنی اقدار یا بچوں کے نام پر سمجھوتہ نہیں کیا۔
اداکار نے مزید بتایا کہ والد کی بیماری اور بعد میں انتقال کی وجہ سے انہوں نے ایک عرصے کے لیے اداکاری چھوڑ دی تھی، اور والد کے دنیا چھوڑنے کے دن ہی انہیں کام کی پیشکش ہوئی تاکہ وہ اپنے فنی کیریئر کو آگے بڑھا سکیں۔
سنیل شیٹی نے کہا کہ عالمی وبا کے بعد انہوں نے خود پر کام کیا، اور مالی استحکام کے ساتھ زندگی میں ذہنی سکون اور اعتماد حاصل کیا۔
انہوں نے یہ بھی بتایا کہ میڈیا اور مداحوں کی محبت نے انہیں باکس آفس پر کامیابیاں نہ ملنے کے باوجود ہمت نہیں ہارنے دی اور انہیں ہمیشہ آگے بڑھنے کی ترغیب دی۔
یہ انکشاف نہ صرف ان کی پیشہ ورانہ ایمانداری کو اجاگر کرتا ہے بلکہ ان کے اصولوں اور نوجوانوں کے لیے مثال قائم کرنے کی خواہش کو بھی ظاہر کرتا ہے۔
