ملک بھر میں طوفانی بارشیں، 8افراد ہلاک، متعدد زخمی۔نشیبی علاقے زیر آب

ملک بھر میں مون سون کی بارشوں نےتباہی مچا دی ہے،شدید بارشوں کی وجہ سےکئی علاقوں میں سیلابی صورتِ حال ہے۔ این ڈی ایم اے کے مطابق پنجاب کے کئی اضلاع کے نشیبی علاقے زیر آب آگئے ہیں۔فیصل آباد، نارووال اور رحیم یار خان میں بارش کے باعث مختلف حادثات میں 8 افراد جان سے گئے۔ راجن پور اور ڈیرا غازی خان  میں کوہِ سلیمان کے پہاڑی علاقوں میں موسلا دھاربارش سےندی نالے بپھر گئےجبکہ صوبہ بلوچستان کے علاقوں توبہ اچکزئی، توبہ کاکڑی، قلعہ عبداللہ، پشین اور زیارت میں سیلابی ریلوں سے کھڑی فصلوں کو نقصان پہنچاہے۔چمن میں ریلوے ٹریک سیلابی ریلے میں بہہ گیا جبکہ نوشکی میں ریلوے ٹریک میں شگاف پڑگیا جس کی وجہ سے پاک ایران ریلوے رابطہ بھِی منقطع ہوگیا۔ضلع جیکب آباد کے علاقے گڑھی خیرو کے قریب نہر میں 70 فٹ چوڑا شگاف پڑگیا جس کی وجہ سےدھان کی فصل زیرِ آب آگئی۔ ادھرجنوبی وزیرستان میں شدید بارش کے بعد سیلابی ریلا جنڈولہ بازار میں داخل ہوگیا جس کی  وجہ سے دکانوں کے ساتھ زرعی زمینوں کو بھی نقصان پہنچا۔طوفانی بارشوں سے وانا گومل زام روڈ لینڈ سلائیڈنگ کے باعث کئی مقامات پر بند ہوگئی اور ٹریفک کی روانی متاثر ہے۔خیبر میں بھی بارش کے بعد برساتی نالوں میں طغیانی آگئی ہے،متاثرہ علاقوں میں لوگ اپنی مدد آپ کے تحت حفاظتی انتظامات میں مصروف ہیں۔ حکمہ مو سمیات نے سندھ، پنجاب اور مشرقی بلوچستان کے بعض علا قوں میں موسلادھار بارش کا امکان ظاہر کیا ہے۔